Tulo na ka tuig ang milabay, sa dihang miduaw kanako sa ospital ang suod kong higala kanhi espesyalista nga welder apan pagretiro niya maoy gikalingawan ang pagsulat dinhi sa atoa ug bisan sa laing kanasoran, nga mao si Gally T. Sayson. Niya pa, kadaghan na siya ma-aksidente nga grabe apan swerte kay nabuhi pa.
Diha gani kadtoy higayon nga gideklarar na siya sa doctor nga patay na o clinically dead diha sa helicopter, pag-ulbo sa oil rigger. Sa pag-abot sa ospital, namasin ang mga doctor ug milagro nabuhi nga nasunog ang kalawasan. Aduna say susama kaniya’g hitabo nga atong mabasahan sa mantalaan o sa internet.
Sa Tsina, sa Liangjiang, usa ka babayeng 101 ang edad nga si Peng Xiuhua, sa asoy sa iyang mga anak, patay na gyud dihang ilang gihimulsohan. Dihang napahiluna na sa lungon, haskang panagan sa mga nagbilar kay mibangon ug naglingkod pa sa lungon. Nangutana pas mga anak nganong may daghang tawo.
Matud pa sa patay, may gani kuno nibangon siya aron makita nga daghan diay ang namilar kaniya ug mihigda pagbalik kay nasayod nga sa di madugay dad-on na siya sa crematorium aron sunogon ang patay lawas niya. Og tungod ini, mga sayantis nato sige pa sa pagtoon nga unta mabuhi ang mga patay na.
Hinoon sa atong panahon, diha sa mga ospital, gumikan sa sakit, daghan na ang patay nga buhi pa, kanang ginganlan natog comatose. Buhi pa, kay miandar pa ang utok ug kasingkasing apan patay na kay di na man makalihok. Aduna say ginganlag suspended animation, kanang ibutang ka sa espesyal nga higdaanan.
Dili patay ang pahigdaon niini kun dili mga buhi aron suspendehon una nga di makalihok ang lawas sud sa gitagal nga panahon nga pamat-on og balik. Apan ang Dios ra gyuy makahimo, kun kanus-a kita mabuhi nga wala nay kamatayon.