Pamahayag sa SWS ug Padre Reyes lisod tuhoan

Gipakatap sa SWS nga ang hinimbang mga Romano Katoliko mius-os kuno ngadto sa 37%. Gisuportahan sab kini ni Father Robert Reyes, kinsa miingon nga sa parokya diin siya mag-alagad, naobserbaran pud niya nga mikunhod ang gidaghanon sa mitambong nga misa. Matud niya, ang hinungdan mao ang kakulang sa pari mopasabot sa husto unsay tiunay’ng unod sa mga pasumbingay nga hinukad gikan sa kasingkasing sa bibliya.

Pul-an na kuno ang mga tawo maminaw sa ilang wali tungod sa kakulang sa pagpangandam nilang nagsotana’g puti, diin ang ilang pakigpulong sama sa plakang buak, magbalikbalik ang nota ug puol na kaayong paminawon. Ikaduha, allergy kuno ang mga nanimbahay sa collection bag nga isuroy panahon sa offertory.

Natural. Bati gani mo-homily ang pari, talikdan gyud siya’g hinayhinay sa iyang mga parokyano. Pero wala kini magpasabot nga mibiya na sa pagsimba ang mga Romano Katoliko. Mibalhin lang sila’g laing dapit, diin ang pari maayo kaayong mopaambit sa sagradong kahulogan nga nagpahipi likod sa mga sambingay nga gilitok ni Hesukristo. Gani, magsugwaksugwak man gihapon ang mga simbahan dinhi sa atong dakbayan sa Sugbo sa nagpunsisok nga mga nanimbahay matag Domingo.

Ang ebanghilyo, Padre Robert, maoy nagdala’g kinabuhi sa misa. Importante nga imong matanom ang laming binhi gikan sa sabakan sa bibliya ngadto sa kasingkasing sa matag binuhat nga naminaw sa imong wali aron kini moturok, molambo ug molipang, diin ila rang hisabtan nganong adunay sibot nga ipaduol sa imong dughan sa akto sa opertoriyo. Pero kun miyembro ka sa mga pari, kinsa sila ray nakasabot sa ilang giwali ug makapatulog na lang sa mga tawo...aw, kinsa bay ganahan mobalik pa sa imong eskedyul sa pagmisa?

Sama sa gibuhat sa SWS. Kun mohimo sila’g survey, mamili ra sila’g dapit. Dili na tanan maoy ilang surbehon. Porsiyon ra! Busa, unsaon man nato pagseguro nga ang resulta sa ilang survey, tinuod ug kasaligan? Kining maong buhat usa ka black propaganda. Mahimo ra kaayong ma-monopolize o mamaniobra sa mga tigpasiugda. This is a very misleading act. Dili ni iyaha sa Ginoo. Gikan na ni sa Yawa.

Sa laktod, ang gibuhiang pamahayag sa SWS ug ni Padre Robert Reyes gibase lang sa gamay’ng kabahin. Ug dili sa kinatibuk-an. Wala kini solidong kredibilidad. Makonsiderar kini nga   usa ka dakong tumotumo. Usa ka dakong bakak. Usa ka pagpanglingla. Busa, my dear fellow Roman Catholics, dili ug dili gyud angay’ng tuhoan! — JAVIER Y. TAPULADO,  Banawa, Cebu City