Ang nahinanok nga nagmata

Walay kalainan kini sa usa ka tawo nga na-coma. Kanang bang masakiton nga naghigda nga dili makalihok. Mora’g patay kun imong sud-ongon. Apan masabot mo nga siya nag-antos sa iyang kahimtang kay buhi pa man ang utok ug ang kasingkasing. Wa nay katakos ang hunahuna nga maipadayag ang iyang pagbati. Igo na lang sa inagulo sa kasakit nga giluom ang tumang pagmahay nga ulahi na.

Mahimong mahitabo usab kini kanato kun dili kita kanunay nakaandam sa atong kinabuhi. Kay di man gyud ta kalikay sa daghang lit-ag nga mopukan sa atong paglaom. Usahay hilabihan kitang nakapangandak sa pagkab-ot sa atong pangandoy apan ang linugdangan mao ang kasamok, kalibog ug kapakyasan. Nalimot nga ang kahitas-an mipasidaan niadtong nagpasagad ma-inutil gayod.

Nganong di mo man isugid ug angkonon ang kasaypanan aron kahatagan og sulbad ang imong suliran. Sa ingon magmalinawon ang kinabuhi samtang may tahas o tulobagon pa tang buhaton, matinud-anon sa Dios nga isalig ang tanan. Ang gugma sa Dios maoy giya nga mohatod kanato ngadto sa katarong. Apan dili kadtong tawhanong salingkapaw nga gugma, nga maoy makapa-alaot nimo.

Ang tinubdan sa malungtarong kalipay anaa sa Dios. Dili mo ni mabatyagan kun mosukwahi ka sa balaod niya. Maka-amgo unta kita, ang kinabuhi dili ato. Sa higayon bawion na kini, wa ka nay higayon matubag pa ang imong pagbasol. Busa ayaw hulata ang kalautan mo maoy unang moabot ug ang pagmahay ulahi na. Karon mobangon kana ug palandunga ang kakulangan ug pun-i sa pagbag-o.

Ikidlap na ang imong mga mata basin uromon ka ug sa dayon dili ka na makabangon kay ang kanser sa kasal-anan migamot na ngadto sa kamatayon. Morag panghadlok nga pasidaan apan mao ni ang kamatuoran.  Igo lang ako sa pagpahinumdom sa pamasin, bisan ako makasasala  may mabuhat pa akong kaayohan alang sa atong isig kaingon. Di baya lalim paghaw-as gikan sa ngi-ob.

Ilabi nag natugsaw kas pagpangabkab sa kangitngit. Kun ikaw lang wa kay mahimo nga luwason ang kaugalingon…nga imo pang makita ang kahayag. Sa kamatinud-anon, sangpita ang Ginoo nga maoy bugtong nimo nga paglaom. Kay ablihan niya ang imong kaisipan, aron ayohon  ang nagusbat mong kinabuhi. Kabulahan nga may kahitas-an pang mopahiamgo sa mga hiwing buhat nato.