Gipakita sa simbahang Katoliko ang ilang kahisagmuyo sa pagkahimong balaud sa RH Bill nga hugtanon nilang gisupak. Sa mid-term election sa Mayo, ang mga kandidato ilabi na sa pagka-senador nga nagsuportar sa RH Bill kusganon nilang gisupak.
Ilang gisangyaw ang Team Buhay ug Team Patay. Ang Team Patay mao ang mga kandidato nga dili gustong pabotaran sa simbahang Katoliko sa mga miyembro sa maong relihiyon. Gustong ipakita sa simbahang Katoliko nga adunay Catholic vote.
Apan husto ba niini ang simbahang Katoliko? Unsa kaha ang mahitabo sa simbahang Katoliko kun ang mga kandidato nga ilang gibutang sa Team Patay pulos modaug sa umaabot nga eleksiyon? Kun dili mosunod ang mga miyembro sa relihiyong Katoliko, kay duna may kagawasan ang matag usa sa pagpili sa mga kandidato, dili kaha hinuon mao kini ang sinugdanan sa pagkabahin-bahin sa mga Katoliko?
Angay hunahunaon nga ang nagpaluyo ug nagsuportar sa RH Bill aron hingpit kining mahimong balaud mga Katoliko usab. Kun aduna may laing tinuhoan kanila, lagmit pipila lamang.
Ang pagpanginlabot karon sa simbahang Katoliko sa eleksiyon sa Mayo pinaagi sa pagpakita nga gisalikway gayod nila ang mga kandidato nga maoy responsable sa ilang pagkapakyas sa tinuoray nilang pagsupak sa RH Bill, nagpasabot kini nga hugtanon nilang gitamod ang mga sugo sa Diyos. Gusto nilang ipabatyag sa mga Pilipino nga dakong sala sa tawo nga dili panalipdan ug tumanon ang kasugoan sa Ginoo.
Klaro nga nagkasumpaki ang baroganan sa simbahang Katoliko ug ang mga magbabalaud nga nagsuporta sa RH Bill nga karon usa na ka hingpit nga balaud. Alang sa simbahang Katoliko mao ang katuyoang espirituhanon ug langitnong kaayohan sa tawo. Samtang alang sa mga magbabalaud nga nagpaluyo sa pagkahimong balaud sa RH Bill mao ang kaayohan sa tawo dinhi sa yuta.
Ang resulta unya sa eleksiyon sa Mayo maoy sukdanan kun unsa gayod ang gusto sa kinabag-ang Pilipino. Ang pagsalikway ba sa mga kandidato nga maoy responsable sa pagkahimong balaud sa RH Bill, o ang pagbotar kanila.