Plataporma dili dinaotay

Ang sistema sa pagkampanya sa kaniadto ug karon walay kalainan. Ang magkaatbang nga kandidato nagdinaotay sa pag-atake sa usa’g-usa. Iyagyag ang mga baho sa pagkatawo. Buhaton ang tanan sa pagdaot sa kaatbang nga kandidato aron pagdani sa pagtagad sa mga botante.

Mao kini ang gihimo karon sa mga kandidato alang sa eleksiyon sa Mayo. Apan epektibo pa ba kining maong paagi sa pagkampanya karong panahona ilabi na sa mga batan-ong botante?

Plataporma de gobiyerno ang gikinahanglan sa mga tawo karon. Ang mga batan-on nahinaway pag-ayo sa matang sa kampanya nga daoton ang kontrang kandidato. Karong panahona lisod na madala ang mga botante sa mga ngil-ad nga matang sa pagkampanya sa usa ka kandidato.

Ang tuyo ug gustong masayran sa mga botante ilabi na sa mga batan-on kun unsa ang buhaton sa usa ka kandidato nga kaayohan kun makadaog siya sa eleksiyon. Ang pagyagyag sa usa ka solido ug makatarunganong plataporma de gobiyerno ang gikinahanglan sa mga botante. Usa ka plataporma nga katuhoan ug dili kay usa lamang ka bakak nga pasalig.

Ang karaang sistema ug paagi sa pagkampanya angay nang isalindot. Dili na katuhoan ang mga atake sa mga pagdaot sa usa ka kandidato sa iyang kontra nga kandidato. Usa kini ka sum-ol nga matang sa kampanya nga gisuka na sa mga batan-ong botante.

Baga ang mga batan-ong botante. Makapadaog ug makapapilde sila sa usa ka kandidato. Ang mga batan-on karon lapad og panabot, ilabi na kun nakatungha sila sa taas nga edukasyon. Makamao silang moanalisar sa usa ka kandidato kun angayan bang botaran o dili.

Mayo na sa sunod bulan. Mao kini ang panahon sa paghukom nga ipakanaog sa mga botante alang sa mga kandidato. Usa ka paghukom nga ang tingog sa mga tawo maoy mopatigbabaw.

Ang plataporma de gobiyerno nga iyagyag sa usa ka kandidato ngadto sa katawhan nag-agad usab sa iyang pagkatawo kun katuhoan ba kini o dili. Ug ang mga botante makamaong motan-aw niini ilabi na ang mga batan-on nga gusto’g tinuod nga kausaban ug kalamboan sa dapit nga gipuy-an.