Opisyal na nga nagsugod ang local campaign period. Ubos sa lagda sa Commission on Elections, kadtong mga kandidato kang kansang mga campaign materials gibutang na'ng daan sa wala pa ang kampanya mamahimo na nga mapasakaan og kaso tungod sa premature campaigning.
Apan ang pangutana gihimo ba kaha sa Comelec ang ilang tahas pagdokumentaryo sa mga posters nga sayo nga gipanaod.
Kun wala, lisod na nga mailhan hain ang mga materials nga unang gitaud. Labaw pang lisod na ang pagkiha sa mga kandidato nga malapason.
Importante kaayo nga nadokumentaryo sa Comelec ang mga premature campaign materials ug mapasakaan og kaso ang mga malapason aron ma-disqualify pagsalmot sa election.
Ang mga kandidato nga dili kamao morespito sa lagda way katungod nga mohupot og pwesto sa gobyerno. Kun karon nga nagtinguha pa pag-angkon sa pwesto dili na makamao mosubay sa lagda unsa na kaha kun sila anaa na sa katungdanan.
Sa kadaghan sa mga kandidato nga akong nakita nga nihimo og premature campaigning, hinaut dunay mga kaso nga mapasaka ang Comelec sa mosunod nga mga adlaw.
Akong hagit sa Comelec, ikiha ang tanang mga kandidato nga malapason.
* * *
Salamat ni Kapitan Boyet Sarajena sa Barangay Langtad sa lungsod sa Argao sa mainiton nga pag-abi abi.
Labihan gyud ka lingaw sa bakasyon tungod sa pump boat nga gipagamit ni kapitan Boyet.
Salamat sab ni konsehal Villamora nga personal gyud nga miuban nako ug sa akong pamilya atol sa among biyahe.
Si konsehal Villamora gyud maoy nangunay pagmaniho sa pump boat. Salamat sab ni Dario Gil nga maoy ni-facilitate pagpangita og pump boat.
Dako na gyud ang kalainan sa lungsod sa Argao ubos sa pamunoan ni Mayor Edsel Galeos.
Labihan na kadaghan sa mga dapit nga mamahimong suroyan sa pamilya. Kagahapon didto mi sa nature's park sa Argao.
Nindot kaayo ang maong dapit ug libre pa ang cottage nga magamit. Bugtong nimo nga bayran mao lang ang P5 nga entrance.
* * *