Nagkasabot na kami si Cebu Provincial Director Patrocinio Comendador nga idiritso na lang nako kaniya ang mga report nga akong madawat gikan sa mga magbabasa sa akong lindog.
Hinoon, kadto ra nga mga inpormasyon nga kompleto ug angayan na g’yud nga aksyonan maoy akong ihatag ni Comendador. Sama sa mga drug pusher ug financier sa masiao.
Apan kun ang akong informer mahadlok ‘sab nga motug-an sa ngalan sa ilang ireport, ayaw na lang. Sayonan ka nga konsehal sa lungsod ug kapitan sa barangay financier man kuno sa masiao.
* * *
Tan-awa, miabot ra g’yud ang kinutoban ni MTCC Judge Rosabella Tormis. Gimando na sa Supreme Court nga taktakon siya sa pagka huwes.
Kaniadto. Pwerteng sukoa ni Judge Tormis nako kay ako man maoy nakabalita nga gipasuspenso siya sa Supreme Court. Nakasabot hinoon ko nga adtong higayuna, wala pa man gud siya makadawat og kamandoan nga patubagon siya sa kaso nga gipasaka kaniya.
Kining kamandoan nga taktakon pagka huwes si Tormis nagumikan ni kay nagpabaya siya sa katungdanan. Mao na, abtik kaayo kaniadto nga mohimo’g kasal unya wala diay makaatiman sa iyang gimbuhaton.
Sayonan ka nga kapin sa 3,000 ka kaso nga gisang-at sa iyang sala wala gayud mahimoi bisan gamay’ng aksyon. Porbida! Utro pa ang iyang clerk of court, walay proper recording ug monitoring sa mga kaso.
Aw si Reynaldo Teves nga maoy clerk of court ni Tormis apil nga taktakon sa katungdanan. Dili na sila ipadawat kun mangaplay sa bisan unsa nga opisina sa gobyerno.
Maayo unta og mahimo kini nga leksyon sa ubang huwes.
* * *
Awhagon nako ang kadagkoan sa Department of the Interior and Local Government (DILG) nga ang kontraktor sa mga sakyanan nga gipanghatag sa tanang barangay dinhi sa dakbayan, mandoi ninyo nga ayuhon ang mga gubaon nga sakyanan nga ilang gisuplay.
Apan tan-aw nako dili usab hinoon daghan ang mga multicab nga guba, duna lay pipila kabuok.
Gisubay man gud nako sa rekord sa DILG ug nahibaw-an nako nga ang budget diay nga gigamit pagpalit sa mga sakyanan gikan diay sa Priority Development Assistance Fund ni Senador Chiz Escudero.
Usa ka opisyal sa DILG miingon nga sila maoy naghimo sa bidding ug walay labot ang opisina sa senador. Unya, nahibaw-an pa gayud nako nga ang opisina ni Escudero nagplano nga mohatag usab og duha ka fire trucks sa dakbayan sa Sugbo.
Ingon unta niini ang ubang senador nga motabang kanato.