Gisupak ni Kong. Tomas Osmeña ang usa ka resolusyon nga ipapasar unta sa iyang sakop nga si Konsehal Bob Cabarrubias nga magtugot sa mga estudyante gawas sa Cebu City sa pag-enrol sa Cebu City Medical Center's (CCMC) College of Nursing. Maayo baya unta ang maong resolusyon aron ma-maximize ang pagamit sa maong tunghaan nga gamay na lang kaayo og mga estudyante.
Apan sumala ni Osmeña nga dili kini makiangayon kay ang maong eskuylahan gi-subsidise sa siyudad sa Sugbo. Nakalimot ba si Kong. Osmeña nga iyang gipasiugdahan ang Big Brother program nga niabag sa ubang mga siyudad ug lalawigan sa nasud nga nagkinahanglan og panabang?
Nihatag usab siya sa iyang pork barrel ngadto sa ubang mga dapit nga alang unta sa mga proyekto sa south district diin siya maoy representante.
Mao diay tingaling wala mapasar ang resolusyon ni Konsehal Cabarrubias kay dili man diay uyon si Kong. Osmeña niini. Sumala pa sa nag-obserbar sa politika sa siyudad nga walay mahitabo diha sa Cebu City council kun way go-signal ni Kong. Osmeña. Mao ba? Kun tinood, kining mga konsehal sa BOPK mora diay og mga pahoy sa humayan ni Osmeña
Akong isugyot sa mga konsehal sa Bando Osmeña - Pundok Kauswagan (BOPK) nga mananghid usa sila kang Kong. Osmeña sa dili pa sila mopasaka og mga ordinansahon ug resolusyon aron dili sila masupalpal.?
* * *
Ang pork barrel nga karon gitawag na nga priority development assistance fund (PDAF) usa sa mga kontrobersiyal nga isyu sa politika.
Kadaghanan sa mga politiko buot nga ipadayon kining PDAF. Mao kuno kini ang naghatag og patas nga tinuig nga gahin sa tanang mga kongresista (P70 milyones) ug senador (P200 milyones) alang sa pag-ugmad sa ilang tagsatagsa ka mga dapit pinaagi sa nagkalainlain nilang proyekto.
Sayud hinoon kita nga kining PDAF o pork barrel maoy nakapadato sa kadaghanang mga kongresista ug senador nga kaniadto maglisud gani pagpalit og sakyanan.
Anaa hinooy ubang mga nanglansar karon nga buot nga tangtangon na kining PDAF. Ambot og kinasingkasing ba kining ilang baruganan o nagpagwapo ba lang sila sa mga botante.
Sa pagkatinood, kun wad-on na kining PDAF kon pork barrel maihap na lang sa tudlo ang modagan pagka-kongresista ug pagka-senador.
* * *
Ang Pilipinas sa dili madugay mao na ang usa sa mag-unang sugalan sa kalibutan.
Ang Macau mogul nga si Lawrence Ho mibobo na og $600 million sa higanteng casino sa Manila nga gipanag-iya ni Henry Sy, ang Belle Corporation.
Upat ka mga korporasyon ang gihatagan og franchise sa atong gobiyerno aron magtukod og casino sa usa ka gatus ka ektaryang Entertainment City sa Manila Bay. Matag usa kanila kinahanglang mogasto og labing minus usa ka bilyon dolyares.
Samtang ang Belle Corporation moabli sa sunod tuig ang laing casino resort nga Solaire nga balor og $1.2 billion magsugod sa ilang operasyon ugma.
Ang usa nga gipanag-iya ni Japanese tycoon Kazuo Okada mag-abli sa tuig 2015 samtang laing casino nga gitukod sa Malaysian Genting group mahuman sa 2017. Gipaabot nga mokita ang nasud og $10 billion matag tuig gikan sa mga turistang moanhi sa nasud aron pagsugal sa maong mga casino.
Samtang makahatag kinig daghang trabaho sa mga Pilipino ug makapaburot sa panudlanan sa nasud dili ba supak man ang simbahan niini?
Asa man ta ani, sa salapi nga magamit sa gobiyerno alang sa basic services ug mga imprastraktura o sa moralidad nga maoy gikampanya sa simbahang katoliko?
* * *
Bisan unsaon pagpangatarungan ug pangulipas sa kadagkuan sa University of the Philippines (UP) dili nila mahumpay ang kalagot sa mga tinun-an ug sa katawhan sa pagpakamatay ni Kristel Tejada.
Si Kristel nga nagtungha sa unang ang-ang sa kolihiyo sa UP - Manila naghikog tungod kay walay ikabayad sa iyang utang sa eskuwelahan.
Naninguha siyang molampus sa pagtuon aron iyang matabangan ang iyang kabus nga pamilya apan naburong tungod lang sa kapin sa 10 mil nga bayranan sa tunghaan. Nganong wala man mangita og paagi ang UP sa pagtugot kang Kristel sa pagtiwas sa pipila na lang ka semana nga klase?
Kining UP usa ka state college kang kansang operasyon gisuportahan nato pinaagi sa atong mga buhis. Siyaro og wala gayud silay kalooy sa dalagita nga mahimo man unta nila kining patiwason sa school year apan pugngan lang ang pag-release sa iyang grado kun dili siya makabayad. Kining mga magtutudlo ug ang administrasyon sa UP gibuhi sa atong buhis apan wala diay kasingkasing nga malooy sa mga tawo nga nagsweldo kanila?
Email: msr1144@yahoo.com