Pagpaabot sa sunod Santo Papa

Mahimong duna nay bag-ong Santo Papa sa imong pagbasa ini. O mao pa lay pagsugod sa taas nga pagpaabot sa pagpili sa bag-ong pangu sa 1.2 bilyones ka Katoliko sa tibuok kalibotan puli sa ni-resign nga si Pope Emeritus Benedict XVI.

Samtang nangatog ta, gipahigayon ang labing unang hugna sa botasyon sa 115 ka kardinal. Kun may makakuha og 77 ka boto, gihangop na ning higayona sa tibuok kalibotan ang ika-266 ka Santo Papa. Kun itom ang aso sa panghaw sa Sistine Chapel magpadayon ang mga huhungihong sa panagsungi sa mga mithi nga angay’ng huptan sa sunod nga pangu sa simbahan.

* * *

Italyano ang posibleng maoy gigamit sa conclave. Ang mga kardinal may duha ka pormal nga kahigayonan sa pagsuhito sa opisyal nga pinulongan sa Vatican: Una, ang pila ka tuig nilang pagtuon sa pontifical universities sa Roma, sama sa Pontifical Gregorian University; ug ikaduha, ang ilang mga tigom sa Roma matag lima ka tuig, ang ad limina, uban sa Santo Papa ug ubang mga tagduma sa Vatican.

Wa gyud hinuoy nakaseguro unsay pinulongan nga gigamit sa pagpili sa bag-ong Santo Papa. Nanumpa nang mga kardinal nga motak-om sa tanang panghitabo sud sa Sistine Chapel. Way translator nga tugotang makatambong ug makatabang sa mga prinsipe sa simbahan nga di pa suhito sa Italyano. Samtang Latin pa gihapon ang opisyal nga pinulongan sa simbahan nitidlom nang paggamit ini sukad sa Second Vatican Council sa dekada '60. Gawas sa Italyano, ang ubang pinulongan sa mga kardinal mao ang Espanyol ug Iningles.

* * *

Hinigpitan na hinuon ang kahigayonan sa mga kardinal nga magsultianay atol sa conclave. Kun tumanon ang lagda sud sa Sistine Chapel, limitado ang mga pung nga maluwatan sa mga kardinal. Mangluhod sila ug mangaliya. Dayon manumpa sa Latin sa ilang paghug sa ilang balota sa urna nga ipahimutang sa altar.

Ang pormal nga pahibawo sa resulta sa mga botasyon, duha sa buntag ug duha sa hapon, posibleng himuon sab sa Latin. Magkasultianay ang mga kardinal sa laing pinulongan kun mangadto na sa ilang apartments alang sa pagpangaon ug pagpamahuway. Karong nagsugod nang conclave, pinili na lang ang mga kawani sa Vatican nga tugotan nga makigsulti nila.

* * *

Usa sa duwa nga nitumaw samtang nagpaabot ang kalibotan sa sangpotanan sa conclave mao ang “Adopt a Cardinal.” Kun moduaw sa adoptacardinal.org, ang website maoy mopili og kardinal alang nimo aron nga sagupon ug pangaliyahan. Gitumong ni aron way kardinal nga mataligam-an.

Mahimo kang mangaliya nga ang kardinal maoy mapili nga Santo Papa. O, kun wa kang kaila sa kardinal, mahimong ipangaliya nga giyahan sa Espiritu Santo aron nga makapili sa labing takos nga Santo Papa.

* * *

Email: [email protected].