Haskang karakara namo og pangita sa mga opisyal sa Department of Public Works and Highways (DPWH) nga makatubag sa mga pangutana sa mga motorista ug mga pasahero mahitungod sa nagpadayon nga mga proyekto pag-ayo sa kadalanan ug mga taytayan sa Sugbo.
Dihang hapit na mi motahan, kay tanan namong gitawgan may gitambongan nga dinalian ug mahinungdanong mga tigom, o mao pa gyoy pagbiya sa ilang buhatan, natsambahan ni June Perez sa DYAB Radyo Patrol si Marie Nillama, ang tigpamaba sa DPWH 7. Salamat sa kamapailubon ni Nillama, akong gilista sa ubos ang iyang mga tubag sa kasagarang mga pangutana (KMP) o frequently asked questions (FAQ):
* * *
Pangutana: Nganong gisapawan man intawon og aspalto ang sementado ug hamis pa kaayo nga Cebu North Road, ang nasudnong highway nga nagsumpay sa Dakbayan sa Mandaue ug sa amihanang Sugbo?
Tubag: Kay labaw sa sementado nga kadalanan mas mahigalaon ang aspalto sa mga ligid sa mga sakyanan (segun ni Nillama), mas paspas nga modagan ang mga sakyanan ug mas madaginuton sa krudo ug gasolina (segun sa suppliers sa aspalto) ug molungtad og mas dugay ang semento (segun sa mga inhinyero sa DPWH).
* * *
Pangutana: Nganong gikagis man ang karaang aspalto aron lang pulihan og aspalto ra gihapon sa Ouano Avenue sa Mandaue Reclamation Area?
Tubag: Kay kun tapakan og laing sapaw sa aspalto, molabaw na ang dan sa gutter (segun sa kontraktor).
Pangutana: Nganong wa na man lang sementoha ang Ouano Avenue aron molungtad og mas dugay?
Tubag: Kay aspalto ray maabot sa gahin sa proyekto (segun ni Nillama).
Pangutana: Nganong nagsugod na man og lupyak ang bag-ong aspalto sa Ouano Avenue nga wa pa gani mahuman ang proyekto?
Tubag: Kay nagsige og uwan gawas nga nabuslot ang tubo sa Metro Cebu Water District (MCWD) ug ang tubig maoy mortal nga kontra sa aspalto (segun sa project engineer).
Pangutana: Nganong wa may kanal aron di magpundo ang tubig?
Tubag: Wa maapil sa budget (segun sa project engineer).
* * *
Pangutana: Tinuod bang sa ulohang buhatan sa DPWH himuon ang tanang subasta sa mga proyekto?
Tubag: Di. Ang mga proyektong ubos sa P50 milyones isubasta sa district offices; ang P50 milyones ngadto sa P150 milyones isubasta sa rehiyonal nga buhatan; ug ang P150 milyones pataas iya na sa nasudnong buhatan (segun ni Nillama).
Pangutana: Kinsa man ang moila unsang proyektoha ang unang trabahuon?
Tubag: Mga kawani sa DPWH ang magsusi sa infrastructure projects nga kinahanglang ayuhon. Karon pa lang nanglista na sila sa mga trabahu-unon sa 2014. Makasugyot ang mga magbubuhis sa mga proyektong depektuso ngadtong Highways Secretary Rogelio Singson pinaagi sa email (singson.rogelio@dpwh.gov.ph) o koreyo (segun ni Nillama).
* * *
Email: leo_lastimosa@abs-cbn.com.