Kun ang usa ka property nga giprenda nganha kanimo unya wa kabayri hangtud nga namatay na lang ang nagprenda, mamahimo kini nimong maangkon kun ang iyang mga legal heirs mosugot nga ibaligya na lang ang maong property nganha kanimo ug sila ang mopirma sa dokumento alang niini. Unsay proseso kun ang nagprenda namatay na ug gusto sa giprendahan nga iya na lang paliton ang property? Kana nga pangutana ang atong tubagon karon.
* * *
Dear Atty. Flores,
Una sa tanan kumusta, duna unta koy pangutana bahin sa yuta sa ako uncle nga ulitawong guwang nga naprenda niya sa akoa . Pagkamatay sa ako uncle ako ang naggasto tanan kay ingon ako mga uncle ug auntie ako man ang giprendahan sa iya yuta ako daw mogasto sa iyang pagpahiluna ug pagpalubong para akoa na ang yuta isip bayad niini so ako pangutana unsaon man nako aron maako na jud ang yuta?Unsa may angayan nakong buhaton niini? Best regards
— Jovencio
* * *
Dear Jovencio,
Kun ang imong uncle namatay nga way anak ug wa na say mga ginikanan ug way gibilin nga Last Will and Testament, ang mamahimong sumusunod sa iyang mga kabtangan mao ang iyang mga igsuon. Kun ang yuta sa imong uncle nakabutang sa iyang pangan ang imong buhaton aron mabalhin ni sa imong pangan mao ang pagpahimo og Extra Judicial Partition with Sale nga pagapirmahan sa tanang igsuon sa imong uncle kay sila may nahulog nga sumusunod sa maong property. Buot ipasabot sa maong Extra Judicial Partition with Sale nga ilang gibahin-bahin ang maong property ug ila kining gibaligya nganha kanimo. Ang maong extra judicial partition with sale kinahanglan butangan kini og presyo kun pilay ilang baligya, imo lang kwentahon kun pila ang pagprenda niini kanimo plus ang imong naggasto sa pagkamatay sa imong uncle. Human sa pagpapirma niini ngadto kanila kinahanglan kini nga panotaryohan ug dayon imong i-submit sa BIR aron sa pagbayad sa Estate Tax ug Capital Gain Tax ug Documentary Stamp Tax. Kun aduna na kay makuha nga Certificate Authorizing Registration kon CAR gikan sa BIR imo kining i-submit sa Assessor’s Office aron pagbalhin ngadto sa imong pangan sa Tax Declaration niini ug kun titulado imo kining i-submit sa Register of Deeds aron pagbalhin sa titulo ngadto sa imong pangan. Hinaut nga akong natubag ang imong pangutana.— Atty. Divine
Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa flores_divina@yahoo.com. ug akong tubagon ang inyong pangutana pinaagi sa akong column matag Miyerkules ug Domingo.