EDITORYAL - Nakalimtan na ang P100 milyones nga jueteng money

Ang  mga tigpaniid nakabantay  nga  ang  P100 milyones  nga  da  sa  usa ka jueteng lord  niadtong  gihurot  sila  og  patay  sa naghiusang  puwersa  sa kapolisan  ug  mga sundawo didto  sa Atimonan , Quezon   niadtong buwan  sa Enero ning tuiga nakalimtan  na  sa dayon.

Bisan  ang  mga  tinugyanan  sa NBI  nga  maoy  miimbistigar  ning  maong  kaso, giingong  nakakompleto  na sa ilang  imbistigasyon  ug gani  naratsada  ang  tanang  polis  ug sundawo  nga  nalambigit  sa maong  masaker  sa 13 ka tawo nga  pasakaanan  na  og  kasong  criminal  ug  administratiba.

Apan nabantayan  sa  kadaghanan  nga  hilom  kaayo  ang  mga  tinugyanan  sa NBI  bahin  sa P100 milyones  nga  da kuno  sa jueteng  lord  nga  usa  sa 13  ka tawo  nga nagsakay  sa duha  ka SUV  nga gipauwanan  og  mga  bala  busa  napuo  ang  tanan.

Usa  ka  kongresista  sa  usa  sa  mga  distrito  sa Quezon  nakapangutana  hain  ug  asa  na  ang  maong  kuwarta? Nganong  nahilom  ug  nahanaw  daw  aso  ang  maong isyu?

Baniog  baya  kaayo  ang  maong  balita  bahin sa dakong kantidad  nga  salapi  nga dala  sa jueteng  lord  ug mao  man gani  rason  nga  guwardiyado kaayo  kini  sa maong  biyahe.

Unya  gidudahan  sa maong higayon  nga way laing tuyo  ang  mga  mimasaker kanila  kundi  ang maong  kuwarta.

Apan  kinsa  may makatug-an  niini kun  ang  mihakot  niini  mibahin  sa maong salapi  sa patas  nga  paagi.

Kay  kun  adunay  sakop  sa maong  grupo nga  diskontento  sa iyang  bahin o wa gyud  kini  bahini, aw sigurado  mao  kini unang  mopahungaw  sa maong isyu.

Sa  gidak-on  sa kantidad, di mahitabong giputos lang kini og panyo  ug sayon  nga gisud sa bulsa sa nakapunit, apan  tungod kay   sigurado  man  nga dako   gayud  ang  gisudlan  niini , klaro  kaayo  nga  ang  tanang  sakop  sa grupo  nga  mipatay  sa 13 ka tawo  nasayod bahin  sa maong  salapi. 

Apan ang  kongresista  nga  misalig  sa NBI  sa katakus  niini  moimbistigar  sa  mga komon kaayong   kaso   sama  niini gibati  og kapikal  nganong  hilom kaayo  ang  NBI  sa maong  isyu. Giingon ra ba nga ang kuwarta  makabota  ug  makapa-amang  usab  sa tawo. Ambot  ba oi.