Ug nagkalawom ang gahong nga nahimutangan ni suspended governor Gwen Garcia:
“Gawas nga wa kahatagi og temporary restraining order (TRO) sa Court of Appeals (CA) ang iyang pagka suspenso sud sa unom ka buwan nga gimando sa Malakanyang, karon gipangayoan na og katin-awan ang iyang mga abogado nganong di sila sagpaon og contempt tungod sa ilang pasangil nga tua kapusta sa mga kaatbang ni Garcia ang usa sa mga maghuhukom sa CA; ug
“Kun di makakuha og TRO gikan sa Korte Suprema karong semanaha, mahimong kapahamtangan og laing unom ka buwan nga suspenso human mabasahan sa iyang mga kasong kriminal sa Sandiganbayan tungod sa pagpalit og luna ilawom sa dagat.
* * *
Nagsugod ang kaso ni Garcia sa CA nga puno sa pasalig nga panalipdan sa hukmanan ang iyang katungod batok sa pagsuspenso sa Malakanyang niya human gikonbikto ni anhing Secretary Jesse Robredo sa Department of Interior and Local Government (DILG) sa pag-abuso sa gahom ug pagyatak sa buhatan ni anhing bise gobernador Greg Sanchez. Ang naghinobrang kamasaligon ni Garcia maoy gipasikaran pagsakmit sa iyang buhatan sud sa kapin sa buwan. Dihang ningitngit ang TRO ug nagmingaw na sa Kapitolyo, gigamit ni Garcia ang mga butanding sa Oslob nga lusot paggawas, sukwahi sa panganti nga “over my dead body.†Apan ang gibiling pasangil batok ni CA Associate Justice Vicente Veloso maoy nakapasamot sa iyang kaapiki.
* * *
Naanad nang mga Sugbuanon sa lahap nga sinultihan sa mga Garcia. Sud sa dul-an sa duha na ka dekada nang pagtungkawo sa Kapitolyo, nilingiw na lang ang taga Sugbo sa labihan nilang kahawod. Nga mora’g sila ray kamao. Ug nga makuha bisan unsay gusto. Apan di sama kamapasayluon ang CA. Human gimaymayan si Garcia nga sayop ang kaso nga gipasaka ug ang korte nga iyang gidangpan, karon gipahinumdoman na nga ang pagbasura sa gipangayong TRO di hukom ni Veloso kun dili sa tibuok 12th Division. Gipasidan-an pang iyang mga abogado nga kun usbon ang samang lakang ipa-disiplina na sila sa Korte Suprema.
* * *
Bakikaw ang kalit nga pagkuwestiyon ni Garcia sa CA. Siya ang nidangop ug nisumiter sa iyang kaugalingon sa hurisdiksiyon sa korte. Gani iyang mga abogado ang nangugat pagpasabot nga ang mga pangutana sa mga mahistrado atol sa oral arguments nga nagkuwestiyon sa mga lagda nga gigamit sa petisyon kabahin sa pagsukitsukit sa tinuoray nga kontrobersiya. Maapiki sab si Garcia kun padayunon pagkuwestiyon ang kaligdong ni Ombudsman Conchita Carpio-Morales. Kay makapahinumdom lang ni sa mga Sugbuanon nga gipakatug ang mga kaso batok niya sud sa daghan uyamot nga katuigan. Dihang ang nagtungkawo sa Ombudsman mao pa si Merceditas Gutierrez. Nga itoy sa iyang gitalikdang amo nga si kanhi presidente Gloria Arroyo.
* * *
Email: leo_lastimosa@abs-cbn.com