Maayong timaan alang sa mga nagtinguha og kausaban sa Simbahang Katoliko ang kapakyas sa mga kardinal pagtakda og sayo nga petsa sa conclave. Kanus-a manud na sila sa Sistine Chapel aron sugdan ang karaan ug tinagoan nga ritwal sa pagpili sa sunod nga Santo Papa. Ang upat na ka adlaw nga pagtuki sa tinuod nga kahimtang sa Vatican nagkahulogan nga ang kinabag-an nga taga gawas maoy nipatigbabaw batok sa mga kardinal nga nagduma sa labing mahinungdanong mga buhatan sa simbahan.
Taga Vatican diay ang nagsige og pasalig nga magsugod nang conclave niadtong Lunes, Marso 4, nga ang conclave di abtan og tulo ka adlaw ug nga makapili na sila og puli ni Pope Emeritus Benedict XVI sa wa pay Domingo, Marso 10. Gipilpil sila sa mga kardinal nga nabalaka sa mga eskandalo sa Vatican ug wa magpa-sigeng-sigeng sa Curia (ang gabinete sa Vatican).
* * *
Ang duha ka sermon nga gitakda sa mga lagda nga kinahanglang paminawon sa mga kardinal sa di pa sila magpili sa bag-ong Santo Papa motuki sa duha lang ka butang: Ang kahimtang sa simbahan ug ang mga mithi nga angay’ng huptan sa sunod nga papa.
Klaro nga ang kinabag-an sa mga kardinal way plano nga hingpit nga mag-agad sa mga sermon, nga ang una nahimo na sa unang adlaw sa ilang tigom. Kay ang sermon giandam ra sab sa ilang kaubanan nga nagtungkawo sa Vatican. Gusto silang maghimo sa ilang kaugalingong pakisusi sa mga kontrobersiya sa panalapi ug ubang aspeto sa simbahan ug kinsa ang mga kardinal nga labing takos nga makapuli pagduma sa simbahan.
* * *
Nakabentaha sab sa kalangay ang mga kardinal nga way katungdanan sa Vatican. Magkadugay ang conclave magkadako ang ilang kahigayonan nga mailhan sa kinabag-an sa mga kardinal. Nga ang kanunay nga ikasugat, ikasulti ug ikatrabaho mao rang taga Vatican nga maoy modawat ug moatiman sa mga panginahanglan sa ilang mga artsidyosesis. Nabatian na sa beteranong mga sakop sa media sa Italya, nga maoy labing suhito sa Vatican, ang pag-ulbo sa lalis tali sa mga kardinal nga Italyano ug sa mga kardinal nga taga Estados Unidos ug taga Alemanya. Mga Italyano niinsistir nga wa kinahanglana ang kalangay. Mga Kano ug mga Aleman maoy gipaluyohan sa mayoriya sa ilang pagtataw nga way angay’ng dalian.
* * *
Pipila sa gituki karon sa mga kardinal:
• Unsaon pag-atiman ang pangabuso sa kaparian batok sa kababayen-an ug kabataan, ipadayon ang paglilong o dawaton ang sugyot nilang Luis Antonio Kardinal Tagle ug kaubanan nga paatubangon ang mga pari sa responsibilidad sa ilang kalapasan; ug
• Piyongan pa bang mga eskandalo sa Vatican Bank o itugyan nang dakong katigayonan sa simbahan ngadto sa ubang mas kasaligan nga mga bangko?
* * *
Email: leo_lastimosa@abs-cbn.com