Malampuson ang pagpahigayon ni Dr. Jose ‘Dodong’ R. Gullas og libreng kasal sa 34 ka paresan didto sa St. Therese Parish Church, Lahug, ning dakbayan pipila pa lamang ka semana ang milabay. Nalipay ang mga bag-ong kinasal. Nalipay si sir Dodong uban sa iyang kapikas nga si Ma’am Nena. Ug ang nalipay pag-ayo labaw sa tanan, ang atong Ginoo.
Ang premarital sex usa ka dakong sala. Nahisupak kini sa kabubut-on sa Diyos. Apan subo nga palandungon sanglit daghan mang maghinigugmaay nga kontento ug mahilig sa tilawtilaw lang bisa’g wala pa sila makasal. Hangtod nga sa ilang tagotago, namunga ang kanunay nilang palamilami. Si Inday nabuntis. Pastilan, tin-edyer pa ra ba! Unya ang lalaki, kay estudyante sab, wala pay trabaho. Okey lang, kun ang mga ginikanan nila adunahan, pulos masinabuton ug may ikasarang pagluwas sa dungog sa babaye pinaagi sa pagsapwang-hatod kanila ngadto sa sakramento sa kaminyoon.
Apan sagad mahitabo, magkinontrahay ang mga ginikanan sa matag habig. Ang anak kasab-an taman sa ginhawa, unya palayason pa! Imbes pasayloon ug tabangan ang mga anak nga nakasala, tiwasan pa hinuon. Ilabi nag igo-igo lang ang kahimtang sa mga ginikanan. Ug wala’y ikagasto bisan sa usa ka simple ug baratohon lang unta nga kasal. Kini maoy usa sa mga hinungdan nganong daghan nadisgrasyang bilahan ang modangop na lang sa lib-in lib-in, o puyopuyo. Nalimot sila nga ang pagbuhat sa ingon, sama ra nga naglangoy-langoy sila sa dakong lim-aw sa kasal-anan. Hinungdan, nga bisa’g unsaon nila’g kayod aron moasenso, di gyud mairog. Kay wala may blessings sa Kahitas-an ang ilang panag-ipon.
Nakita kining tanan ni Sir Dodong Gullas. Naluoy siya sa ilang kahimtang. Gusto ni Sir Dodong nga maluwas sila sa ilang pagpakasala (tiaw bay, uban kanila daghan nag-anak unya wa pa gyud makasal), hinungdan, nga mipunit si Sir Dodong og pipila ka pudyot sa iyang bahandi aron maoy iyang ipaambit ngadto sa mga linalang nga nanginahanglan niini.
Niadtong Pebrero 1, 2013, ika-79 nga kasumaran sa iyang adlaw’ng natawhan, agi’g birthday gift sa iyang kaugalingon, gipakasal niya sa simbahan ang 34 ka paresan, diin iyang giangkon ang tanang galastohan. Hinuon, may make-up artist ug food catering nga misumpay sab pagtunol sa ilang serbisyo ug pagkaon nga libre.
Pagka-anindot sa gibuhat ni Sir Dodong Gullas. Niining panahon nga ang iyang adlaw talisalop na, siya naningkamot nga ang nahabilin niyang kahayag magkulit og matahom nga talan-awon ning kalibotan sa dili pa muabot ang kangitngit sa iyang kagabhion. Pagka-bulawanon ning mga tunob nga iyang gitanom sa matag duruha ka kasingkasing nga nahiusa tungod sa dako niyang gugma sa iyang isig ka tawo. Ang mga gilak niini, kapanaminan! -- Javier Tapulado, Banawa, Cebu City