Hangtud kanus-a
Nahitabo gyud ang gikabalak-an nga mahitabo sa mga igsuon natong Pilipino didto sa Sabah, Malaysia.
Niadtong Biyernes gilusob sa mga sakop sa Malaysian police ang mga sakop sa sultanate sa Sulu nga nagkampo didto sa lungsod sa Lahad Datu. Human sa pinusilay 12 ka mga sakop sa sultanate sa Sulu ang namatay samtang sa habig sa Malaysia duha sa ilang mga police commando.
Dali nga mimando si Presidente Aquino sa mga sakop sa sultanato sa Sulu nga motahan sa ilang kaugalingon nga way kondisyon.
Apan bisan sa kamanduan nagmagahi ang mga sakop sa sultan ug nanganti nga andam magpakamatay ang kapin sa 200 niini ka mga sakop nga tua sa Sabah.
Kun tinud-on sa mga sakop sa sultan ang ilang bahad posibling silang tanan mahurot gyud og kamatay sa mga kamot sa mga awtoridad sa Malaysia.
Ang dili klaro karon unsay plano sa gobyerno sa Pilipinas alang nila. Manghinan-aw lang ba ang gobyerno ni Aquino nga hinay-hinayan og ihaw sa Malaysia ang mga molupyo niini? Ug inig kahuman igo lang ingnon ang ilang kabanay nga mayra kay mga gahi man og ulo sama sa gihimo ni Sec. Mar Roxas human sa hitabo niadtong Biyernes?
Naguol ko naminaw sa kumentaryo ni Roxas nga miingon nga " ang tigas kasi ng ulo."
Kuwang nalang niya ingnon nga mirisi ang mga namatay.
Tinuod gipahimangnoan daan sa gobyerno ang mga sakop sa sultan. Apan pahimangno nga dala ang pagpanghulga.
Dihang unang nangabot ang mga sakop sa sultan didto sa Malaysia miawhag ang atong gobyerno nila nga mamauli dinhi sa Pilipinas uban ang bahad nga sila dakpon tungod sa paghupot og mga armas.
Kun ikaw maoy naa sa ilang dapit kinsa may ganahan mopauli ug nahibawo kang dunay nagpaabot nga modakop nimo?
Ikaduha way klarong plano ang gobyerno unsaon pagtubag ang ilang gipangayo nga makuha ang ilang teritoryo.
Dili igo ang pasalig nga tun-an ang claim sa sultanate sa Sulu tungod kay sukad sa sinugdan nahibawo sila nga kuwang sa sinsiridad si Aquino.
Matud sa sultanate nga dugay na nilang gipaabot sa gobyerno ang ilang gipangayo apan wala ni tagda.
Ambot tungod ba kay ang mga Kiram nga maoy sultan sa Sulu nahimong alyado ni kanhi presidente Gloria Arroyo sa politika.
Sa makausa pa nakita na sab ang way klaro nga management sa atong gobyerno sa mga krisis nga ingon niini.
Hangtud kanus-a magpraktis si Aquino? Pila pa ka kinabuhi ang angayang mausik hangtud hingpit makakat-on ang OJT sa Malakanyang?
* * *
- Latest
