Ang mesmerism, eksorsismo ug si William James

Si William James ang nipaambit sa iyang interes kalabot ning maong isyu sa “gipanulayan” o “giyawaan”. Niadtong 1896 gihisgotan kini niya sa iyang Lowell Lectures. Matud niya adunay tulo ka mga matang sa mutations (kun kabalhinan) sa sentido mahitungod sa kaugalingon. Kini naglangkob ning mosunod: Insane, hysteric ug somnambulistic.

Gihimong apas-sumpay ni William James ang ika-upat nga hilisgutan nga dunay kalabotan sa demonic possession o mediumship. Taliwala sa mga pagsupak sa mga siyentipiko, si James nagtuo nga ang espiritu nakasulod sa usa ka agianan, o samaran nga kaugalingon. Sa modernong termino, kini mao ang gitawag og “abli” o opening. Dugang pa, si William James nagtuo nga ang hunahuna usa ka sistema nga mopalutaw og mga bag-ong panghunahuna o ideya pinasikad sa proseso nga gitawag og expansionism ug stagnation. Iyang gikutlo si Propesor Leuba diha sa iyang pag-ingon: “Ang kaseguroan kalabot sa usa ka relihiyosong dogma, usa man usab ka kasinatiang emosyonal.” Ang maong kaseguroan pinasikad sa usa ka emosyonal nga kasinatian, ang nakahaling sa usa ka pagtuo ug pagdawat nga dunay mga espiritu o yawa nga nakaapekto sa kinabuhi sa tawo. Nasuportahan usab kini sa dili hisabtang mga panghitabo diha mismo sa aktwal nga ritwal sa eksorsismo.