Kun may kaikog lang unta

Ang Comelec morang bugoy nga bag-o lang nakasuway. Dihang gipangutana kun guwapa bang iyang uyab, taas kaayo og tubag: Taas iyang buhok, nindot iyang batasan, magkasabot sila sa tanang butang, dungganan ang mga ginikanan, tam-is ang pahiyom, maayong moda og sinina ug, labaw sa tanan, labihang putia og paa.

Lahi hinuon sa bugoy sa ibabaw ang Comelec wa molihay sa pangutana kun makahimo ba si Jun Pe pagdagan pagka konsehal sa habagatang distrito sa Dakbayan sa Sugbo karong hapit na mahuman ang ikatulong sunud-sunod ug kataposan niyang termino pagka konsehal sa habagatang distrito sa Dakbayan sa Sugbo. Apan mubo rang ilang tubag nga mora’g wa sila ganahi nga mohusay sa kontrobersiya.

* * *

Mao ni hinungdan nganong nangangkon og kadaugan si Pe. Bisan klarong gi-disqualify siya sa Comelec. Sa laing sukaranan: Ang kakuwestiyonable sa iyang tinguha pagbalhin pagpuyo sa habagatang distrito samtang padayon pang nagrepresentar sa amihanang distrito sa Cebu City Council. Mao sab ni hinungdan nganong nikisikisi ang kampo ni Mayor Mike Rama. Bisan gipaboran sila sa Comelec. Ambot ngano. Nahadlok ba kaha sila sa pangangkon ni Pe nga sayon ra niyang kumbinsihon ang Comelec nga sa habagatang distrito na siya nanukad pagbayad sa iyang bills ug pagpatawag sa iyang press conferences. O wa pa lang kabantay si Rama nga nidaog diay siya.

* * *

May sukaranan hinuon silang Rama ug kaubanan nga makuwangan sa ilang kadaogan. Kay kun residence ray nakit-ang problema sa Comelec, sayon rang pamatud-an ni Pe nga gibaligya nang iyang bay sa amihanang distrito. Sa way paghisgot sa iyang kaminyuon.

Gawas pa, samang argumento magamit batok sa ig-agaw sa mayor nga si Anabelle Rama. Nga klarong tua pa gihapon magpuyo sa Manila ug moduaw lang sa Sugbo aron pagpangampanya. Samang magamit sab batok sa kinabag-an sa mga opisyal sa kalungsoran. Nga ang tinuod nga mga pinuy-anan mao ang ulohang mga dakbayan sa ilang mga lalawigan.

* * *

Mahimo ganing gamiton batok ni Liberal Party (LP) Cebu Chairman Jun-Jun Davide. Sa una niyang pagdagan pagka gobernador niadtong 2010, kanus-a nagparehistro siya sa Argao bisan wa pa mapupos ang iyang termino pagka konsehal sa amihanang distrito sa Dakbayan sa Sugbo. Magamit sab batok ni Yayoy Alcoseba. Nga nidagan pagka board member sa unang distrito sa probinsiya bisan wa pa mapupos ang ikatulong termino pagka konsehal sa habagatang distrito sa Dakbayan sa Sugbo. Apan ang Comelec di mahimong mamunit og mga kaso aron husayon. Magpaabot lang sila nga may mga kasong ipasaka. Bisan gani dunay kiha kasagaran yak-an pa sud sa daghang katuigan. Kay wa may kaso batok nilang Rama, Davide ug Alcoseba, ang kaso rang Pe maoy atong malauman nga mohusay ning maong kontrobersiya.

Nga di unta motumaw kun si Pe may gamay pang kaikog.

* * *

Email: [email protected]