Lisud ihan-ay nga ipasabot ang lintunganay nga kahulugan sa kalipay. Tungod kay tagsa-tagsa sa tawo, aduna may nagkalainlaing panukdanan nga masinati o mabati ang kalipay. Apan ang tukion nato karon, mao kining mga hiyas nga angay himoong kabahin sa kinabuhi, aron ang tinuoray nga kalipay maangkon.
Ang unang buhaton nato, mao ang hustong panan-aw o pagtratar mismo sa kaugalingon. Kinahanglan nga makita ang kaligdong sa disisyon, nga dili basta matarog. Anaa sa katakos nga maantigong mopailob ug mosabot sa kaangayan. Maoy mithi nga ang kaugalingon himuong galamiton sa panginlabot alang sa kalamboan. Halapad ang dughan sa pangalagad nga may malasakit.
Dili kaayo palabian nga itaas ang atong pagkatawo apan ayaw sad ibutang nga sobra pud anaa sa kaubos, aron ka respetuhan nga di ma-abusaran. Dunay dugokan sa ka tarong nga di mapahimuslanon. May panlantaw sa maayong kinabuhi, dili lang sa kaugalingon. Pursigido mobuhat nga may maayong epekto.
Ang ikaduha nga makalipay, kinahanglan usab atong angay nga ihusto ang pagtratar sa uban. Unsa man ang dili gusto nato, dili sab nato buhaton sa uban. Kun unsay kadaugang nakab-ot, ato silang hataga’g higayon nga makakat-on. Ug malipayon nga motabang bisag di sangpiton, nga way pag-isip nga kabayran.
Ang ikatulong buhaton aron ka malipay, mao usab ang husto nga pagtratar nimo sa katilingban. Adunay duha ka matang ang tawo sa ilang panan-aw sa katilingban. May tawo nga permi positibo ug aktibo sa kalihokang katilingbanon. Ang uban, negatibo ug way nahimong maayo nga ikatampo alang sa katilingban.
Tungod ani, pihong mahimsog ang kinabuhi mo kay ang tinubdan sa tinuod nga kalipay mabatyagan man nga dili kahulipan bisa’g duyanon ka pa sa bulawan.