Diha sa pag-atake
PEBRERO. 17, 2013: Unang Domingo sa kuwaresma
Mga Pagbasa: Dt. 26;4-10/Sal 91/Rom. 10;8-13/Lk. 4;1-13
Human sa bunyag si Jesus niadto sa kamingawan ug didto gisulayan siya sa yawa pinaagi sa pagtental kaniya. Buot sa yawa nga mahilayo si Jesus gikan sa Dios ug mapakgang ang bisan unsang laraw sa Dios alang kaniya.
Apan bisan pa man sa maong mga haylo, si Jesus nagpabilin gihapong matinud-anon. Dili sala ang tentasyon, hinunoa, usa kini ka okasyon sa pagpakasala. Ang yawa mohatag sa iyang tanang haylo ngadto sa tawo. Anaa ra sa tawo kun magpadala ba siya sa maong mga haylo. Busa angay ug matarong lamang nga ning panahon sa kuwaresma atong hinuklogan ang mga higayon diin kita wala magpabiling matinud-anon sa atong mga panaad ngadto sa Dios.
Tinuod anaa ang tentasyon apan wala kini magpasabot nga ang imong pagkamahuyang maoy imong pasumban aron magpalayo ka sa Dios diha sa pagpakasala. Pag-ampo sa kanunay ug pangayoa nga magpabilin kang lig-on taliwala sa mga pagsulay.
- Latest
