San Remegio, Cebu
Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Gipatuman sa Comelec ang gun ban sugod niadtong Enero 13, 2013 ug matapos inigka human sa piniliay karong Mayo. Gituyo kini sa Comelec aron masiguro ang kahapsay ug kalinaw sa tibuok nasud sulod ning panahona. Ubos sa nahisgotang gun ban, gidid-an ang mga sibilyan sa pagdala og armas gawas sa ilang panimalay kun wala’y pagtugot sa Comelec.
Ang mga kapolisan, kasundalohan ug mga security guards makatinil lamang og armas panahon sa ilang trabaho. Entonses, higpit gyud kaayo ang Comelec gun ban. Apan naunsa na man kini karon nga ang mga kriminal sa atong katilingban yano-yanohon man lang ang paglapas sa Comelec gun ban. Pikatan man lang ni sa ilang mga mata. Ngano man?
Tungod kay pipila pa lang ka adlaw ang nakalabay, si Erwin Barcenas, ig-agaw sa Bise mayor sa Carcar nga si Patrick Barcenas gipusil-patay diha sa highway, barangay Tuyan, Naga City samtang nagbackride kini sa motorsiklo sa iyang amigo.
Karong bag-o pa lang, usa ka ngilngig ug duguong hitabo diha mismo sulod sa Palace of Justice sa atong Kapitolyo. Alas otso pasado pa ang takna sa kabuntagon, gipamusil patay ni Canadian national John Pope sila si Atty. Jubian Achas, Dr. Rene Rafols ug naangol si Fiscal Matet Casiño. Pagkatapos sa krimen, nagpusil ngadto sa kamatayon sigon pa sa taho si John Pope.
Kining hitaboa nakapaukay ug nakapanlimbawot sa balhibo sa atong mga kaigsuonan.
Pila pa kahang mga kinabuhi ang makalas ubos sa Comelec gun ban?
Kinahanglan, hugtan pag-ayo sa atong mga otoridad nga matuman sa hingpit ang Comelec gun ban aron dili magkatawa ug magbiay-biay ang mga kriminal sa atong katilingban!
Unsa, di ba husto?