Ang pagkanaog ingon nga Santo Papa ni Benedicto XVI

Ako nakalitan sa hukom nga gibuhian ni Papa Benedicto XVI. Apan alang kanako angay pud siyang daygon ug tahuron sanglit ang gipakita ni Papa Benedicto XVI usa man ka mapaubsanong pag-angkon sa kamatuoran nga ang iyang panglawas ug kabaskog dili naman makahimo aron iyang matuman ang mga katungdanan diha sa papasiya.

Wala kini makapakunhod sa akong pagtahud kaniya ingon nga pangulo hinunoa gidayeg ko siya sa iyang pagkamatinud-anon. Tinuod nga wala’y pagpahuway diha sa pangalagad apan angay pud untang tan-awon nga dili mamahimong epektibo ang pangalagad kun lawas mo luya na kaayo dili ba?

Kun tingog mo dili na kahimo? Kun disposisyon mo dili na kalahutay? Human sa Pebrero 28 si Papa Benedicto ang mogahin sa mga nahabiling yugto sa iyang kinabuhi diha sa usa ka mahilom nga pag-ampo sulod sa Monasteryo.

Butang nga alang kanako usa ka pangandam sa katapusang yugto sa pakigsuod sa Dios diha sa paaging suod ning temporal nga kalibotan.

Gidayeg ko siya kay wala siya mawili sa iyang posisyon. Panig-ingnan kini alang ni bisan kinsa nga nanlimbasog nga magpabilin sa pwesto bisan pa man kun dili na gyud intawon makahimo...Husto gyud ang ilang giingon: If you are young you do not have experience, if you are old, you should retire.