Ikaduhang hilisgutan

Ang Eksorsismo diha sa Kasaysayan[1]

B.    Ang Sikolohikal nga Sukaranan

Ang relihiyon sa tibuok kalibutan adunay kinaugalingon nga paagi sa pagtudlo o pagpasabot sa isyu kalabot sa “Gipangyawaan” o sa mga nasudlan og dautang mga espiritu ug ang mahitungod sa ritwal nga ginganlan og eksorsismo. Kini naglangkob sa mga pag-ampo sa paghingilin, mga lihok o mga gamit sama sa asin (exorcized salt), bendita, krusipiho, ug uban pa. Ang mga eksorsista mga mananambal sila sa mga sakit nga kalagnon kang kansang hinungdan yawan-on. Sa panlantaw sa uban, ang maong isyu adunay dakong kalambigitan sa inadlaw-adlaw nga pagkinabuhi sa mga tawo segun sa mando sa relihiyon, o kultura. Apan angay natong hinumdoman nga ang eksorsismo dili usa ka hinanaling tubag sa usa ka matuod nga problemang pisikal, emosyonal ug sikolohikal. Usa kini ka iresponsabling tambag[4] ug moresulta na hinuon sa mas grabe pang kahimtang sa tawo.

Panahon sa Ikaduhang Gubat sa Kalibutan, ang mga sundalo nahiagom sa gitawag pa nila’g Battle Neuroses apil na niini ang “SHELL SHOCK” diin ang usa ka tawo ang mibiya sa naandang kalibutan sa normal nga pakiglambigit ug nipuyo siya sa kaugalingong kalibutan nga linugdangan mao ang kahadlok sa pakiggubat. Tungod niini ang biktima dili na maantigong makiglambigit sa naandang kalibutan. Tungod niini ang mga drugas sama sa ether ug methderine ang ipainom sa pasyente aron mahitabo ang usa ka emotional catharsis. Pinaagi sa pagpagawas sa maong emosyon makatabang aron makab-ot ang kaayohan gikan sa maong estado. Kini usab ang gamit sa eksorsismo. Si William Sargant nagkanayon:

“….Ang karaang ritwal sa pagpapahawa sa bisan unsang demonyo ang adunay susamang pamaagi sa pagtambal sa battle neuroses. Pinaagi sa pagpagawas sa naghinobrang emosyon sama sa naghinobrang kasuko, o kahadlok aron maangkon ang kalinaw maingon nga ang usa ka pasyente nga naluwas gikan sa mga kasinatian sa trauma.”

Adunay kasamahan ang proseso sa eksorsismo sa proseso nga gitawag og Mesmerism nga gikutlo sa ngalan sa tigpasiugda niini nga nailhan nga si Mesmer. Matud pa, si Mesmer aron makalingkawas ang tawo sa bisan unsang mga emosyon o pagbati nga dili maayo o wala kinahanglana sa pamaagi sa usa ka eksorsista nga ginganlan og Johann Gassner. Wala magsalig o migamit si Mesmer og mga ritwal o dili ba superstisyon sa pag-atubang sa isyu. Mao nga niadtong 1775, usa ka panagsungi ang nahitabo tali nila ni Mesmer ug Gassner gumikan sa managlahing panlantaw o baruganan. Ginaingon pa nga kun ang tawo nagtuo nga ang Demonyo ni-impluwensiya sa iyang kinabuhi o sa iyang pagkatawo mamahimo kining kabahin sa iyang sistema maingon nga ang tawo nga nagtuo nga ang Dios nakigsulti kaniya ang makahimo usab niini kabahin sa iyang sistema.