Katahom sa pagtinabangay

Sa wa pa motingog si Padre Enrico Peter Silab, presidente sa University of San Jose-Recoletos, way opisyal sa USJ-R nga gustong manubag sa mga pangutana sa publiko mahitungod sa nikatap nga sex video sa ilang tinun-ang babaye. Ang pipila nga nangahas pagpanubag sa mga sakop sa media nagdumili pagpakita sa ilang nawong ug niinsistir nga di ilhon ang eskuylahan.

Human niatubang si Silab pagpahibawo sa determinasyon sa USJ-R pagtabang sa naapiki nga tinun-an ug pagpanalipod sa uban nilang mga tinun-an ug mga kawani, hapit ang tanang Josenians nakaginhawa og luag ug nagsaulog sa paglingkawas sa labing lisod nga bahin sa krisis.

* * *

Nanakod dayon ang isog ug ligdong nga baruganan ni Silab. Si Candice Gotianuy, ang batan-on nga tagduma sa University of Cebu (UC), nipadayag sa iyang hingpit nga pagpaluyo sa USJ-R pila lang ka oras human sa press conference ni Silab.

Giawhag ni Gotianuy ang mga tinun-an sa UC pagtahud ug sa di pagbugalbugal sa mga tinun-an ug mga kawani sa USJ-R. Nahasol siya sa mga taho nga iyang nadawat nga may tinun-an sa UC nga nakaaway sa usa ka tinun-an sa USJ-R tungod sa sex video scandal. Nadasig sa sulti ni Silab nga “USJ-R Inspires,” nagplano ang UC pagpasul-ob sa ilang mga tinun-an og buttons nga “UC Respects.”

* * *

Kun mosunod sa sumbanan sa UC ang ubang eskuylahan ug kahugpongan, hingpit nga mokaylap ang kaamguhan ngadto sa mga tinun-an ug sa ilang mga ginikanan. Nga ang eskandalo angay’ng mahimong tinubdan sa leksiyon sa pagmatngon, di kahigayonan sa pagtunglo.

Di sayon ang pagbadlong sa mga wa kinahanglana nga pagpanungog. Apan karong nibarog nang USJ-R pagpasalig og hingpit nga tabang sa mga biktima, ug tanang may kabuot makaamgo sa kagamhanan sa institusyon, ug human sa pagdason dayon sa UC ug ubang nagpakabana nga kahugpongan ug sa pasidaan sa kapolisan ug lokal nga mga opisyal, mahimong mahipos nang mga mapahimuslanon.

* * *

Kun pabilin pang nagtago ug nangiyugpos ang kadagkoan sa USJ-R, padayon untang piyestahan sa mga way lingaw ang ilang babayeng mga tinun-an. Kun gipalayas ug gipasagdan pa simbako sa kadagkoan sa USJ-R ang naapiking tinun-an sa sex video, nalumos na unta ron sa mga tulisok nga naneguro lang pagluwas sa ilang kaugalingon.

Ang lapad nga suporta nga nadawat sa USJ-R, UC ug ubang kahugpongan makapahinumdom nato sa kabililhon diay sa panaghiusa. Katam-is diay sa bation kun magkasinabtanay. Kalalim diay sa lunsay nga pag-inunongay. Kadako diay sa atong mahimo kun magkuptanay. Kadaghan kaha sa atong mapanalipdan kun padayon nga magtampohay. Kalayo kaha sa atong maabtan kun padayong magtinabangay. Kamalambuon kaha sa Sugbo ug sa nasud kun di na mag-unay.

***

Email: [email protected]