Adunay ubang kaminyuon gikonsiderar sa balaod nga void kon dili balido tungod kay kini misukwahe o nakalapas sa provisions sa atong Family Code busa kini mamahimong kabasihan sa pagpasaka og declaration of nullity of marriage or Annulment. Apan ang pagminyo sa mag-agaw gidili ba usab kini sa balaod? Kana nga pangutana ang atong tubagon karon.
* * *
Dear Atty. Divine,
Maayong adlaw kanimo ug sa imong mga kaubanan sa Banat News. Aduna lang unta koy ikonsulta kanimo labot sa akong problema sa akong anak nga nakigrelasyon sa iya ra usab nga ig-agaw. Bag-o lang nako nga nahibaw-an nga ang boyfriend sa akong anak paryente ra diay sa side sa akong bana. Amo nang gisultian ang akong anak niini apan gibalewala lang man ang among tambag kaniya nga dili unta maayong ipadayon ang ilang relasyon kay ig-agaw ra sila sa lalaki. Ang akong pangutana Attorney kun ugaling magminyo ang akong anak sa iyang ig-agaw mamahimo ba kini? Balido ba unya ang maong kaminyuon? Unsa may angay nako nga buhaton? Hinaut nga imo kong matambagan sa akong problema.
— Melody
* * *
Dear Melody,
Dili tanang kaminyuon sa collateral relatives kon manag-agaw ang gidili sa atong balaod. Ubos sa Article 37sa atong Family Code ang kaminyuon tali sa ascendants ug descendants of any degree gidili gyud kini sama sa inahan ug anak, amahan ug anak, lola ug apo or lolo ug apo lakip na ang kaminyuon sa magsuon whether full or half blood kay gikonsiderar kini nga incestuous. Apan sa collateral relatives, ubos sa Article 38 sa atong Family Code ang mag-agaw nga gidid-an sa pagminyo kutob lang sa 4th civil degree kon first cousins, sa ato pa, kun ang gikarelasyon sa imong anak karon, anak sa imong igsuon dili sila mamahimong magminyo kay gidili kini ubos sa balaod by reason of public policy. Apan kun ang boyfriend sa imong anak, ig-agaw niya apan layo ra nga pagka paryente way balaod nga nagdili kanila sa pagminyo ug mamahimong balido ang ilang kaminyuon ug dili nimo angay nga babagan. Hinaut nga akong natubag ang imong pangutana. Thanks and God Bless. — Atty. Divine
Kun aduna moy pangutana, ipadala lang sa Legal Corner sa Banat News or email sa flores_divina@yahoo.com. ug akong tubagon ang inyong pangutana pinaagi sa atong column matag adlaw’ng Miyerkules ug Domingo.