EDITORYAL - Ang Halad Pasalamat ni Sir Dodong Gullas

Human  sa pagsaulog  ni Sir Dodong Gullas  sa iyang ika-79 anyos niadtong Pebrero 1,  diin gihalad  niya  ang iyang tibuok adlaw  sa  pagpakasal  sa  34 ka parisan  nga  magtiayon, gisundan niya  sa Halad Pasalamat niadtong Sabado, Pebrero 2,  nga napahimuslan  sa  kaliboan  ka  mga  tawo.

Dinhi  sa Cebu  dili maihap   ang  mga milyonaryo kansang  mga  negosyo  popular kaayo   ug  kun  miserbisyo  man  sa katawhan, kana  tungod  kay  nahimo  nilang kliyente   ang  mga  tawo  sa ilang patigayon.

Apan lahi si Sir Dodong  ug  ang  minahal  niining  kapikas nga si Mam Nena, kay  may talagsaon  silang  kinaiya  ug hiyas  sa pagpasalamat   una  ngadto  sa  mga ginikanan  ni  Sir Dodong  nga  dugay  nang  mitaliwan  sa   laing kalibotan.

Ang kalipay  sa  mga  tawong nasilbihan  ni Sir Dodong  gikan sa mga  managtiayon  nga  iyang napakasal  ug  sa libo ka libong  mga  molupyo  nga  nakapahimus  sa 24 ka  mga  nagkalainlaing  pangalagad  sa iyang  Halad Pasalamat,  labi  usab  nga  nakalipay  kang Sir Dodong.

Ug sumala  sa  gilibkas niya  sa iyang  mga ngabil sa maong  higayon  nga nasud-ong  niya  ang kamaya sa mga kabus  nga  nalibre  sa mga  serbisyo  nga way  bayad , ang gibati  niyang  kalipay, nakapalipay  usab  sa iyang  mga  ginikanan nga  tua  na sa lubnganan.

Ang maong  kinaiya takus kaayong  makahatag  og  leksyon nga angay sundon  sa tanang  mga  anak,   nga unsa may  kalampusan nato dinhi  sa yuta, nagsukad kini  sa  mga pagtulon-an  nga gigiya kanato  sa atong  mga ginikanan  busa samtang  may  kinabuhi  pa kita,  di ta angay  pul-an  sa pagpasalamat  kanila  bisan  kun  patay  na  sila, sama  sa gibuhat  ni Sir Dodong.

Usahay  murag  di  ta makatuo  nga  ang  sama  kaniya  makigsandurot  ug moalagad  pa sa  mga kabus  nga  wa magpaabot  nga  bayran    iyang serbisyo  lahi  sa   pangalagad  nga  himoon  sa mga  politiko.

Makaingon  ta  nga  kun  ang  tanang  mga adunahan  sama  pa lang   kang Sir  Dodong  nga  giduyogan  usab  sa iyang  minahal  ug maanyag  nga kapikas  nga si Mam  Nena , kadaghan  kaha  sa mahandom  sa  mga  kabus  nga Sugboanon.

Apan mas  maayo  na lang  usab  nga  si Sir Dodong  ra  maoy  may  talagsaong hiyas  ug  may kasingkasing  nga maluloy-on   sa  mga  kabus, aron  siya  lang  ug  wa nay  laing  handumon  matag  karon  ug unya  sa  katawhan  nga  nakapahimus  sa iyang  tim-os  ug   kinasingkasing  nga gugma ug makaingon, KANINYO  SIR  DODONG  UG MAM NENA, DAGHANG  SALAMAT.