Kining budget alang sa maintenance and other operating expenses (MOOE) mahimo diay nga gamiton sa mga senador ug kongresista sa bisan unsa nilang galastuhan.
Walay masayud kun giunsa nila pagamit ang maong salapi kay wala man kinahanglana ang mga resibo ug ubang ebidensiya sa dihang ila na kining i-liquidate. Ang gikinahanglan lamang mao ang certification nga ilang gigasto kini pinasubay sa angayang gastuhan sa MOOE.
Nabunggo kini sa dihang nanghatag si Enrile og dugang pundo alang sa MOOE ngadto sa mga senador. Ang nakadaut kay samtang iyang gihatagan og P1.6 milyones matag usa ang iyang 18 ka higalang senador, P250 mil lamang ang iyang gitunol ngadto sa upat ka mga senador nga iyang kontra nga sila si Miriam Santiago, Peter ug Pia Cayetano ug Antonio Trillanes IV.
Tungod sa pagkisikisi ni Santiago ug ang pag-alburoto ni Cayetano nabulgar ang mga binuang kalabut niining MOOE. Nasayran nga ang senado adunay pundo nga P1.57 bilyones alang sa MOOE matag tuig ubos sa pamunoan ni Enrile. Giunsa man kini pagasto?
Ang sad-an niining tanan mao ang resolusyon nga gipasar sa senado nga gisegundahan sa ubos balay-balauranan nga nagdili sa Commission on Audit (COA) sa pagbusisi sa gigastuhan sa ilang MOOE. Igo lang silang hatagan og certification sa mga halangdong senador ug kongresista nga ilang relihiyosong gigasto ang maong gahin sigun sa gimbut-an sa balaud.
Wala bay mga tawo ug mga organisasyon nga mokuwestiyon niining maong resolusyon ngadto sa hukmanan aron mahukman kun wala ba kini makasupak sa atong batakang balaud?
Sakit hunahunaon nga sa daghang nagkalisud natong kaigsoonan nga nagkinahanglan unta sa maong salapi alang sa ilang pagpakabuhi apan giwariwari lang sa kadaghanan natong mga senador ug kongresista. Dili kini ilang salapi kun dili ato kining buhis.
Akong hagiton ang mga kandidato alang sa kongreso nga mosaad nga i-repeal ang maong resolusyon kun modaug sila karong Mayo 13.
* * *
Niguwa na ang resulta sa survey sa Social Weather Stations (SWS) nga gihimo niadtong Enero. Adunay 1,200 ka mga tawo ang gipangutana kun si kinsay ilang botaran pagka-senador sa Mayo 13 nga piniliay.
Ang nag-una mao si Sen. Loren Legarda (65 percent) gisundan ni Senador Chiz Escudero (62 percent) ug Sen. Allan Peter Cayetano (60 percent) sa ikatulong dapit.
Ang ubang kandidato ug ang ilang ranking mao ang mosunod: Kong. Joseph Victor Ejercito - 4th; Sen. Gregorio Honasan - 5th; Sen. Koko Pimentel - 6th; kanhi Sen. Juan Miguel Zubiri - 7th; kanhi Kong. Cynthia Villar - 8th; Kong. Juan Ponce Enrile, Jr - 9th; Sen. Antonio Trillanes IV - 10th; kanhi MTRCB chair Grace Poe Llamanzares - 11th; ug Nancy Binay - 12th.
Ang ubang mga kandidato nga wala masulod sa magic 12 mao kining mosunod: Kong. Juan Edgardo Angara - 13th; kanhi Sen. Richard Gordon - 14th; Paolo Benigno "Bam" Aquino IV - 15th; kanhi Sen. Ramon Magsaysay, Jr. - 16th; kanhi Sen. Maria Consuelo Madrigal - 17th; kanhi Kong. Risa Hontiveros - 18th; ug kanhi Senate President Ernesto Maceda - 19th place.
Kining SWS ug Pulse Asia mga kasaligan nga mga survey firms. Bisan sa mga pasangil batok kanila apan katuhuan kaayo, bisan dili perpekto ang ilang survey.
Apan dinhi sa Sugbo, diha kunoy survey nga gihimo sa mga estudyante nga gibayran ni Glen Soco, kandidato sa pagka-bise gobernador.
Ang resulta mao nga nakakuha kuno si Kong. Pablo John Garcia og 48.7 porsiyento samtang si Atty. Hilario Davide III nakakuha kono og 47.9 porsiyento. Ang laing kandidato sa pagka-gobernador Roliveth Cortes nakakuha og 0.7 porsiyento. Sa mao gihapong survey nag-una si Soco sa 40 porsiyento. Si acting gobernador Agnes Magpale 36.1 porsiyento ug si Ramon Durano IV nakaani og 20.3 porsiyento.
Sayang ang dakung gasto alang sa maong survey kay dili man motoo ang kadaghanan sa mga tawo niini. Magamit hinoon kining propaganda sa mga politiko pagpatoo sa mga botante aron mosakay niining gitawag nga "bandwagon" kon sa gipasiatab nga mga dumadaug kunuhay nga kandidato.
Everybody is entitled to his own entertainment, di ba?
* * *
Gi-dismiss sa Sandiganbayan ang kaso batok kang kanhi Lapu-Lapu city mayor nga karon kongresista Arturo "Boy" Radaza ug 12 ka laing opisyal sa gobiyerno kalabut sa pagpalit sa mga lampposts, nga sumala pa overpriced, atul sa 12th Association of Southeast Asian Nations (ASEAN) nga gihimo dinhi sa Sugbo niadtong Enero 2007.
Dako kini’g matabang sa paglimpiyo sa ngalan ni Kong. Radaza ug sa iyang pamilya. Makatabang usab kini sa kandidatura sa iyang kapikas, Mayor Paz ug sa iyang anak nga si Aileen nga modagan pagka-kongresista puli kaniya sa lone district sa Lapu-Lapu.
* * *
Pagkadugay bang milugwa sa desisyon sa court of appeals kalabut sa gipangayong temporary restraining order ni suspended governor Gwen Garcia? Unsa may inyong tagna nganong nadugay kini?
Sulati (e-mail) ako kay ato kining ipatik sa sunod natong lindog (kun dili pa mapakanaug ang desisyon nianang tungura).
Email: msr1144@yahoo.com