EDITORYAL - Bisan may helmet basta magdanghag patay gyud

Hapit  matag adlaw  may  mangamatay  nga  magsakay  sa motorsiklo  bisan magsul-ob  og  helmet  ug  ang  hinungdan  mao  ang  kadanghag.

Sa miaging adlaw  gikang  nanisko, unya  gituohang  nakatulog  samtang  nagpadagan  sa motorsiklo  didto na moagi  sa pikas  lane  sa karsada  ug midasmag sa gikasugat  nga sakyanan,  busa  namatay.

Mao  gihapon  ang  nahitabo  sa  uyoan ug  pag-umangkon  dihang  nagpatuyang  pagpadagan  ang  pag-umangkon sa motorsiklo   nga  iyang gimaneho  diin  angkas  niya  ang  iyang  uyoan.

Wa  na  niya  makontrolar  ang dagan  sa motor, milapas  gihapon  sa pikas  lane busa siya’y  midasmag  sa dakong  sakyanan.

Unya  nagdungan  sila  og  lagpot  ug  ang  iyang uyoan,  ug  nagdungan  usab  sila  og  tugpa  nga  pulos  nag-una  ang  ulo  sa sementadong  karsada.

Ang  uyoan  nagrabihan  pag-ayo  nga  misangpot  sa hinanaling kamatayon  niini  samtang  ang  pag-umangkon  kritikal  usab  ang  kahimtang.

Ang  maong  mga  biktima  pulos  may  helmet, apan  wa  na  kini  mosaler  tungod  sa  kakusog  nga  pagkabundak  sa ilang bagolbagol  sa  karsada  ug gilupig  ang   kalig-on  sa ilang  bagol-bagol  sa kalig-on  niini

Ang  kadanghag  o  kakompiyansa  maoy  dali  nga  makahunos  sa kinabuhi  sa  tawo.

Ang motorsiklo    duha  ray  ligid,  busa  dali  ra kaayong  mosaliring  kun  di balance  ang   kargamento  niini  o  kaha  di  kaantigong  manimbang  ang  magdala  sa  maong  sakyanan. Sa  bisan  asang  karsada  sa lalawigan, way  maayong  laki  nga  magmaneho  og  sakyanan  nga  puno  sa kakompiyansa.

Ang  dali kaayong  masugamak  sa  dugoon  nga  disgrasya  nga usahay  mokutlo  og kinabuhi  mao  kadtong  mga  tawong  hanas  na  modala  og  sakyanan   o  gitawag  nga beterano  na  sa pagdala  sa duhay  ligid  nga sakyanan.

Gumikan  sa kahaniti,  usahay  piyong-piyongan  lang  ang  pagpadagan  sa motor  apan takulahaw  lamang  molupad  ug  motugpa  nga  patay na.

May  mga karsada  nga  tanus  ug  may  maglikoliko  usab, apan  bisan  asa  niining  duha  pulos  di  angay  mokompiyansa    sa tanus  nga dalan   kay  usahay  may  mokalit  lang  og labang  sa karsada, ug  kun di ka kabantay  seguradong  masikwati ka. Samtang  sa likoon nga dalan  ang  pagkawat  sa pikas  lane  sa karsada   maoy  dali kaayong  makapahalin  sa kinabuhi  sa motorista.