EDITORYAL - Ang pagbaton og armas de fuego

Ganado  kaayo  ang  uban  mokupot  og  armas de fuego, aron  ipanghambog  nga may armas  sila, sinaw kaayo, unya nindot  kaayong  hikaphikapon, duwa-duwaan  nga  usahay  mas makalimtan  pa  paghikap si Mrs. kay  sa  maong  armas.

Unya  bisan  dakponon, ganahan  gyud  ang tawo  mosuway  og  dala-dala   niini  pangandoy nga  kun  may  moparegla  kaniya  gamiton  dayon  niya  ang  maong  armas.

Ganahan  kaayo  mopraktis=praktis  og patuyok-tuyok  pinaagi sa iyang  tudlo sa kamot  sama  sa  mga  pistolero  sa  salida  sa  sine  nga  maayo  kaayo  mohimo  og  exhibition sa armas.

Gumikan  kay  gusto  lagi  nga  masud-ong  ang  buto  sa iyang  armas  kun di  ba mabawog  ang  barrel  inigbuto, mopasalba  usahay  bahala  na  og  may  maigo  sa iyang  saag  nga  bala.

Madugay   og  tinangkil  sa iyang  armas, nga wa siyay  maluthang  tungod  kay  wa siyay  kontra, mobati  siya  og  kapuol, hangtud  nga ibilin na lang  ang  iyang  armas  sa iyang  balay.

Unya  may  mga  higayon  nga  si Mrs. ilabi  na  kun  motokar ang  selos, mosuway  og gamit  sa    maong armas, aron  ipunting  ngadto  sa bana  o kaha  sa iyang  kaugalingon  aron maghikog.

Si Mr. nga  mobati  og  kahasol, mapugos  sa pagbaligya  sa maong armas  ug makaingon  nga way  kapuslanan  ang  maong  butang.

Kini  maoy  labing  maayong  desisyon  kay  ang usa ka tawong armado, init  kaayo  og  ulo  nga  kun may  makaaway  gusto  nga patyon  dayon  pinaagi  sa iyang  armas  de fuego.

Usahay  di  kaantigo  mokuwenta  nga  kun  siya makapatay, aw  adto  gyud  siya  magpahayahay  sa  prisohan,  ang iyang  nindot nga trabaho biyaan, ingon  man  ang  iyang  sakyanan  ug  labaw  sa tanan  si Mrs  kuyaw  kun moduwa og laing team.

Kun siyay  hipatyan  aw labaw  na, goodbye  ang tanan. Busa  nganong  ganahan  man  ang  tawo  sa armas,? Kay gusto  kang  mopatay? Gusto  kang manulis? O gusto  kang  magpakamatay.?  Hala  pili  lang.