Higala ko si Sto. Niño

Tuguti ko ninyo nga sa makausa pa ako kamo nga sayran sa pagka milagroso ni Sto. Niño. Kini maoy rason nga dili molubad ang pagyukbo ko kaniya.

Dili gayud nako makalimtan kadtong usa ka hitabo didto sa Sitio Bakhaw, barangay Catmon-Daan, Catmon kaniadtong Hulyo 25, 1995.

Mga alas 10:30 sa buntag. Kusog ang uwan, dangog ang karsada. Usa ka tawo nga nagsakay sa iyang motorsiklo paingon dinhi sa dakbayan sa Sugbo, gidasmagan og usa ka prime mover nga nagguyod og trailer.

Ang kusog nga nagdagan nga prime mover nga nagguyod og trailer tungod sa kadangog sa karsada nagbabag-babag samtang nagpaingon sa amihanang bahin sa Sugbo.

Milugapak ang motor nga gisakyan sa maong tawo human madam-agi sa higanteng sakyanan.

Abi gayud nako og namatay ang maong tawo kay tiaw mo nga milatay man ang ligid sa tuo niya’ng paa ug bitiis. Sa panabang ni Señor Sto. Niño, ang maong tawo wala maunsa ug nakaangkon lang og mga pangos.

Ang tawo nga nagsakay og motor nga gidam-agan niadtong prime mover, mao intawon ako. Ang mga tawo nga midugok nakapanglingo-lingo kay maayong pagkakupog sa akong motor.

Matag tawo nga nakakita sa nakupog nakong motor, nakatuaw g’yod kun naunsa ang sakay. Dili sila makatoo nga ako pa ang nag-traffic sa mga sakyanan nga buot moagi sa gamay na lang nga agianan.

* * *

Gitagsa-tagsa nako sa paghandum ang hitabo. Nahinumdoman nako nga dihang nagkaduol na kanako ang prime mover, misinggit ko ug nangayo’g tabang kang Santo Niño.  Natumba ko didto sa kanal daplin sa karsada, ug ang pangunahang ligid dapit sa drayber, diha g’yod miagi sa akong tuo nga bitiis ug paa.

Gani, ang gisul-ob nako nga karsones niadtong higayona, nagisi pa dapit sa tuo nga paa ug naporma og “ L .“ Hangtud karon, gitipigan ko ang maong karsones isip handumanan.

Sa wala pa ang maong hitabo, daan na akong deboto ni Sto.Niño. May mihatag kanako og imahen ni Sto. Niño kaniadtong 1981 ug matag adlaw gayud ako kining hagkan sa dayon nakong gikan sa balay kun molakaw ug inig-abut nako inigka-gabii.  Ingon niana ang akong gihimo sulod sa 14 ka tuig hangtud nga ang akong mga pag-antos, gigantihan ni senyor Sto. Nino. Gikan niadto, misamot nga gihimo na gayod nako siya nga idolo ug higala.

Gihimo na nako nga panaad nga matag solemn procession ni Sto. Niño, sama sa pagahimoon karong hapon, bisan og mag-uwan man, mouban ko sa prosesyon.

Hapit tanan sa akong gipangayo ni Sto. Niño iyang gihatag kanako. Sangpita siya pinaagi sa pagsinggit – Pit Senyor!