Sukwahi sa makita o madungog sa pamantalaan, radio ug TV, ang atong nasud nagping-it sa kalisod o kanihit sa pagkaon kay way ikasarang sa pagpalit. Apan di usab ikalimod, nga duna na poy daghan nga makita nato sa palibot, ang nanambok sa sobrang pagkaon. Dunay mga bata pa lang, mahimuot kaayo ang ginikanan nga magtan-aw sa ilang anak nga namusdik tungod kay maayo kaayo mokaon. Nga way kulba sa dautang epekto niini kun magdako nga tambok.
Hinuon maayo man sad og dakuon o tambokon ang lawas sa tawo. Apan ang delikado lang nga kun di na kapugngan ang hilabihan nga gana sa pagkaon, mas madoble o triple modako na ang timbang kay sa normal niyang lawas. Malagmit nga anaa na siya sa kahimtang sa katambok nga masakiton o obesity. Niburot na pag-ayo ang lawas. Tungod kay nidako na pud ang kapasidad sa tungol busa dili ka matagbaw. Kun may kuwarta kang minilyon, pwede na mapagamyan ang tungol.
Og kun madala pag-balanse sa pagkaon o diyeta, angay ka malipay kay makamenus ka sa gasto sa operasyon sa tungol nga ihaum o ibalik sa normal, aron magsugod na sa husto nga istilo sa pagkaon nga mabalik sa kahimsog. Hibaw-i ang tawong hilabihan ka tambok, dali ra takboyan sa sakit sama sa heart attack, hayblad, diabetes, kidney ug uban pang komplikasyon sa mga sakit. Busa aron malikayan ni, atimana gyud nga mapaubos sa imong normal nga timbang.
Sulayi nga mag-anad ka nga una mokaon, moinom kag daghang sabaw, isunod ang prutas aron di na daghan ang makaon mo. Ayaw pagpabusog kanang igo lang nga mabati mo nga may sulod na ang tiyan mo. Likaye o minusi ang pagkaong mantikaon, sobra sa tam-is o fruit juices ug sobra sa parat. Prutas ang i-snaks. Utanon ug lagutmon ang perming kaunon. Ayaw pagkinamot aron di modaghan ang kaunon. Pag-chopstick kun kahibawo ka mogamit.
Gamay plato ang gamita nga igo ra ug ayaw na pagdugang. Ayaw pag-inom og mga bugnaw. Mas maayo ang init nga tsa imnon kay makatabang sa paghilis sa kinaon mo. Unya pag-ehersisyo nga maglakaw 30 minutos ka lima sa semana. Likaye ang malabyan mong ampay nga pagkaon o kaha isipon mo nga kanang pagkaona makahilo sa lawas. Matinud-anon ug sinsero, positibo nga makab-ot gyud ang gitinguha nga pagpa-ubos sa timbang nga igo lang sa panglawas mo.