Unsay madawat sa usa ka miyembro sa SSS kun di siya mo-qualify sa monthly pension

Kun ikaw miyembro sa Social Security System kon SSS mas maayo nga imo gyung ipadayon ang pag-contribute niini bisan kun ikaw mohunong na sa pagtrabaho kay mamahimo ka man nga mag-contribute as voluntary. Kini aron pag-abot sa edad nga 60 anyos mamahimo ka nang mo-retire ug mo-qualify ka sa  monthly pension ug ang amount sa imong pension ibasi man sab sa imong contribution. Apan kun ikaw di mo-qualify sa monthly pension sa SSS aduna ba gihapon kay madawat niini kun ikaw mo-retire na? Kana nga pangutana ang atong tubagon karon.

* * *

Dear Atty. Divine,

Have a nice day to you Attorney, naa lang ko gusto ipangutana nimo about sa Social Security System kon SSS. Ang akong Lolo nagtrabaho kaniadto ug naa siyay remittance sa SSS pero wa makaabot og ten (10) years kay miundang man siya ug miuli sa probinsya. Ang ako lang pangutana Attorney kun naa ba siyay ma claim sa SSS para sad siya makagamit kay ang iya edad karon 68 years old na. Unsa may angay niyang buhaton? Salamat sa imong panahon and hoping you all the best. —Jun

* * *

Dear Jun,

Bisan kun wa moabot og 10 years ang contribution sa imong Lolo sa SSS naa gihapon siyay makobra apan hayan dili na siya mo-qualify sa monthly pension. Ang edad nga mamahimo kang mo-retire ug mo-claim sa SSS, 60 ngadto sa 65 anyos ug tungod kay 68 years old na ang imong Lolo mamahimo na siyang mo file og claim sa SSS. Ang maayo ninyong buhaton mao ang pag-adto sa SSS uban sa imong Lolo aron sa pag-file sa iyang claim ug kun ugaling di siya makalakaw mamahimo ka nga magpahimo og Special Power of Attorney nga pinirmahan sa imong Lolo  aron ikaw na ang mag-file sa claim ug mag follow-up niini sa SSS. Ang SSS mobayad na sa total nga contribution sa imong Lolo lakip na sa interest niini, buot ipasabot nga lump sum ang iyang madawat. Hinaut nga akong natubag ang imong pangutana.— Atty. Divine

Alang sa inyong pangutana ipadala lang sa Legal Corner sa Banat News or email sa [email protected]