Bisan wala pa mahitabo ang oral argument kagahapon didto sa Court of Appeals may labot sa petisyon nga giduso ni gobernador Gwen Garcia nagkwestiyon sa unom ka buwan nga suspension order batok niya, daan na nga namahayag ang gobernador nga di gyud siya mokanaog sa iyang buhatan.
Basi sa mga report nga mibahad si Garcia nga dili mopahawa sa Kapitolyo itugot man o dili sa Court of Appeals ang iyang gipangayo nga "status quo ante order" gikan sa CA.
Kun mao nga dili diay siya andam motuman sa dili paborable nga hukom sa korte, unsa may kapuslanan sa ilang pagdangop didto?
Kun dili andam motuman si Garcia sa mamahimong hukom sa CA, unsa may iyang kalainan ni Presidente Aquino ug DILG Secretary Mar Roxas nga ilang gipasanginlang mihimo og illegal nga kamanduan?
Isip mga batid sa balaud sila sayod nga dili ila ang pagbuot kun unsay illegal o dili.
Mamahimong duna silay legal nga basihanan pagdumili pagdawat sa gipahamtang nga kamanduan mao man gani nga midangop sila sa korte aron sa pagpangayo og husay niini tungod kay sa mga lantugi mahitungod sa balaud bugtong ang korte lang maoy dunay katakos paghusay niini.
Apan kun bisan ang disisyon sa korte dili nato tahuron, lupig pa nato ang labing bangis nga kriminal ug mga diktador sa kalibutan niini.
Hinaut nga nasayop lang pagkutlo ang mga reporter sa pamahayag sa gobernador.
Dili makatabang alang sa mga politikanhong tinguha sa mga Garcia kun padayong magmagahi ang gobernador pagkanaog sa Kapitolyo. Mosugot siya og sa dili maapektuhan sa iyang gihimo ang kandidatura sa iyang manghod nga si Kongresista Pablo John Garcia.
Sama sa akong giingon sa nangaging lindog, ang pagsuspenso ni Garcia tataw nga politika ang hinungdan.
Dili ni tungod sa pasangil sa pangurakot. Busa taas gihapon ang agtang sa gobernador nga moatubang sa mga Sugboanon bisan sa iyang gidangatan.
Mas makakuha sila og simpatiya sa katawhan nga dako og ikatabang sa kandidatura sa iyang manghod kun iyang dawaton ang pagpanggukod sa administrasyon nila kaysa mokapyot siya sa iyang bangko.
Mas daghan og mahimo ang gobernador pagtabang sa iyang manghod dinhi sa gawas kaysa iyang prisohon ang iyang kaugalingon ug tugotan nga hadlaon matag karon ug unya sa ilang mga kaatbang pinaagi sa pagpadala og mga sakop sa SWAT didto sa Kapitolyo.
Hinaot nga mahuna-huna ni pag-ayo sa gobernador tungod kay anugon nga maangin ang kandidatura sa iyang manghod.