Kaila mo nila?

Enero na g’yud ug nagpasabot kini nga nagkaduol na ang eleksyon karong buwan sa Mayo. Mosamot kainit ang pagpangampanya tali sa duha ka nag-unang mga kandidato nga sila si reelectionist Mayor Mike Rama ug Kongresista Tomas Osmeña.

Makaingon g’yud ko nga pulos sila lig-on kay si Rama incumbent nga mayor ug anaa kaniya ang resources. Apan si Tommy lig-on ‘sab kay giila siya nga hari sa Bando Osmeña Pundok Kauswagan (BOPK).

Karong mga buwana, angay na gayud nga mohukom ang mga kapitan sa barangay kun asa sila modapig, dili kay magtago-tago pa. Nakasabot man gud ko nga ang uban dili pa dayon magpaila aron makasigi’g pangayo.

Kun di kamo dumadapig sa mao nga kandidato ayaw pa ngayo ug ayaw pagdawat. Dili ka mauwaw? Basin mapareho ka sa usa ka kapitan nga walay hunong sa pagsigi’g bitbit sa hinatag ni Tommy nga Iapad, unya mangataki.

Nakasabot hinoon ko nganong nangataki og maayo kining maong kapitan ni Tommy kay bugnaw man kaayo ug nindot man sakyan ang bag-ong sakyanan nga gipagamit ni Mayor Rama kaniya.

Apan kun ako pa sa iyang nahimutangan iuli nako ang Iapad nga hinatag ni Tommy kay ngil-ad paminawon nga sige ka og atake unya sige og tangkil ug bitbit sa gihatag sa tawo nga imong giatake.

Aw hinoon, duna may tawo nga dili mobati og kauwaw. Pabaga ba. Ingon usab niini ang usa ka kapitan sa north district, adto siya ni Tommy inig kahuman moadto sab ni Mike.

Kaila mo kun kinsa kining maong mga kapitan?

* * *

Mora’g duna diay reshuffle sa mga election officers nga ipahigayon karong mga buwana. Gitug-anan ko sa suod nakong higala sa Comelec nga si Atty. Marchell Sarno mora’g adto madistino sa dakbayan sa Toledo.

Unya ang election officer sa Toledo nga igsoon ra ‘sab ni Sarno, maoy gihugon-hugonan nga anhi madistino sa dakbayan kana kun walay kausaban. Ang tumong niini kay aron ang mga election officers dili suod sa mga kandidato.

Ang ubang election officers nga apektado sa gitakda nga reshuffle wala pa ko masayod.

Lain pa’y ato, maayo unta og ang mga politiko dili mogamit og sakyanan sa kagamhanan sa ilang pagpangampanya, ilabi na atul sa gabii sa ilang mga pulong-pulong.