Mga anak makabaligya sa property nga ilang nasunod

Ang kabtangan o bisan unsang properties sa ginikanan nga namatay na automatic nga mabalhin ang ownership niini ngadto sa iyang mga anak pinaagi sa succession ubos sa Article 777 sa Civil Code of the Philippines. Buot ipasabot niini, nga ang mga anak isip mga compulsory heirs sa ilang mga ginikanan mao nay makabuot sa maong mga kabtangan ug aduna na sab sila’y katungod sa pagbaligya niini. Apan kining tanan mahitabo lang kun patay na ang ilang mga ginikanan ug di sila makapanghilabot samtang buhi pa kini.

* * *

Dear Atty. Divine,

Ang akong anak nga atua magtrabaho sa Saudi nagplano sa pagpalit sa yuta sa among silingan dinhi sa Cebu. Ang original owners niining maong yuta patay na apan ang pangan sa titulo niini wa pa mabalhin sa pangan sa mga heirs nga mao ang mga anak. Gustong ibaligya sa mga heirs ang maong yuta, apan ang akong pangutana kun okey ra ba kun among paliton ang yuta bisan kun wa pa mabalhin ang titulo niini sa mga heirs?Unsay mga buhis nga angayan unya namong bayran alang sa pag-transfer sa maong yuta sa among pangan? —Lina”

* * *

Dear Lina,

Sa dihang namatay na ang mga ginikanan nga maoy original owners sa maong yuta, ang ownership sa property nabalhin na ngadto sa ilang mga anak nga maoy ilang mga sumusunod pinaagi sa succession. Sa ato pa, ang mga anak mao na karon ang tag-iya sa maong yuta busa aduna na sila’y katungod nga mobaligya niini bisan pa kun nakapangan pa kini sa ilang mga ginikanan. Kun inyong paliton ang maong yuta, ang dokumento nga angayang andamon niini mao ang Extrajudicial Partition with Sale nga pirmado sa tanang mga heirs. Kining maong dokumento mao unya ang basihan sa Register of Deeds sa pag-cancel sa karaan nga titulo ug sa pag-issue og bag-ong titulo ubos sa inyong pangan human unya sa inyong pagbayad sa mga buhis og pagsumiter sa uban pang mga dokumento nga gikinahanglan sa Register of Deeds. Una nimong bayran nga buhis niini ngadto sa BIR mao ang Capital Gain Tax, Documentary Stamp Tax ug Estate Tax. Adunay mga dokumento nga pangayuon ang BIR sa imong pagbayad sa maong buluhisan og kun matuman mo kining tanan mo issue ang BIR og Certificate Authorizing Registration kon CAR. Human niini imong isubmit ang CAR sa Register of Deeds uban sa laing dokumento nga ilang pangayuon alang sa pag-issue unya og bag-ong titulo. Daghang Salamat ug Merry Christmas. — Atty. Divine

Alang sa inyong mga pangutana, ipadala lang sa Legal Corner sa Banat News or email sa [email protected]