Maayo nga tilimad-on kay basi sa statistics, nag-anam gayud og us-os ang gidaghanon sa mga kaso sa dengue dinhi sa dakbayan, ilabi na gayud ang mga namatay.
Apan ang gidaghanon sa mga kaso sa dengue misaka g’yud hinoon kay gikan niadtong Enero hangtud sa Nobyiembre 30, miabot na og 3,632 ka tawo nga natakboyan og dengue nga naadmit sa mga ospital dinhi lang sa dakbayan.
Subra pa sa gidoble ang gidaghanon sa mga kaso sa dengue kaniadtong 2011 nga kapin lang sa 1,600. Apan malipay-lipay na lang ta kay susama ra ang gidaghanon sa mga namatay sa miaging tuig ug karong tuiga, 12.
Nindot g’yud unta kun walay mamatay apan unsaon nga mabasol man usab usahay ang mga ginikanan kay magpasagad man. Hilantan gani ang ilang anak huwaton pa usa nila nga mograbe na usa dad-on sa doctor.
Sa gibalik-balik na sa mga health experts nga inigkaduha ka adlaw maayong pakuhaan na og Platelet Count ang gihilantan aron masuta kun natakboyan ba kini og virus nga dengue. Pwerteng sayona ra nga tambalan sa dengue kun madali lang.
Ang pagsaka sa gidaghanon sa mga tawo nga nasuta nga natakboyan og dengue, akong gitoohan nga dili kini tungod kay misiaw ang mga lamok sa pagpamaak. Angay’ng sabton kini nga alerto na ang mga tawo nga modala dayon sa mga mahilantan ngadto sa ospital.
Tungod niini, miminus ang gidaghanon sa mga namatay. Kay niadtong 2007 ug 2008, kapin man sa 50 ang mamatay sa matag tuig, nagpasabot kini nga gipasagdan lang ang mga gihilantan niadto nga gidala sa doctor dihang grabe na ang ilang kahimtang.
Busa ang akong tambag kaninyo kaigsoonan nga dili kita magpasagad, kinahanglang dad-on dayon nato sa doctor ang mga sakop sa atong pamilya nga mahilantan.
* * *
Sa pagpanghatag sa tag P4,000 nga cash assistance sa mga senior citizens kagahapon, nasilo ang buot ni Konsehal Rodrigo “Bebot” Abellanosa ngadto ni Basak-Pardo Barangay Captain David Tumulak.
Si Konsehal Abellanosa miadto sa Basak-Pardo atul sa pagpanghatag sa cash assistance kagahapon kay siya man maoy chairman sa City Council’s committee on Social Services, apan midali-dali pagkuha sa microphone sa public address system ang kapitan.
Gipahibalo ni Tumulak nga dili sila gusto nga moapil-apil ang mga opisyal sa dakbayan nga pilionon sa umaabot nga eleksyon, masakop man sila sa BOPK o kaha Team Rama.
Apan nangatarungan si Abellanosa nga ang pagpanghatag og cash assistance subay kini sa iyang komitiba. Apan aron lang g’yud walay dakung kagubot, mibiya ra si Abellanosa apan naghambin og kahiubos kang Kapitan Tumulak.
Mao g’yud na ang politika.