Saad sa bag-ong kaugmaon
Dekada na kapin ang milabay dihang una ko’ng nahimamat ang usa sa mga opisyal sa Kapitolyo ug nahimong higala. Bag-o pa ko nagsugod isip reporter sa radyo atol sa maong higayon apan bisan niini wa siya managana pag-abi-abi nako ug abtik nga mitanyag og kape.
Dili siya kamao mamili og tawo ug puno sa kamahigalaon ang iyang kasing-kasing mao nga wala ko masurprisa dihang sunod nako nga nahibaw-an mibiya siya isip pangulo sa Provincial Environment and Natural Resources Office kon PENRO sa Kapitolyo aron pagpapili isip mayor sa iyang pinanggang lungsod sa Pinamungajan.
Subo hinuon nga giayran siya sa una ug ikaduhang higayon niya nga pagtanyag sa iyang kaugalingon nga moserbisyo sa lungsod. Apan taliwa niini wala mapawong ang dagaang sa kainit sa iyang tinguha nga moserbisyo sa lungsod mao nga sa ikatulong higayon subli nga gitanyag ni Glenn Baricuatro ang iyang kaugalingon.
Ug sama sa pagsubang sa kabugason nga nagdala sa saad sa bag-ong ugma sa dili pa ang banagbanag ug ang hingpit nga pagsiak sa kahayag sa kabuntagon aron paghatag og agianan sa paggitib sa unang bidlisiw sa haring adlaw, ingon niini ang paglaum sa kalambuan nga gibitbit ni Glenn alang sa Pinamungajan.
Sigurado ko sa tim-os niyang tinguha pag-alagad sa lungsod ug dili mahitabo nga iyang talikdan ang iyang katagi lungsod sama sa gihimo sa ubang politiko nga sa dugay’ng higayon naghari sa maong dapit. Isip ig-agaw sa gobernador mas sayon alang niya ang pagpangayo og proyekto alang sa lungsod. Dili sab tingali siya balibaran sa iyang ig-agaw kun mangayo alang sa Pinamungajan.
Panahon na sab tingali nga hatagan og kahigayonan ang ubang buot moserbisyo sa Pinamungajan aron makab-ot ang gipangandoy sa katawhan nga kauswagan nga sa dugay’ng panahon gihikaw kanila tungod sa pagdominar sa usa lang ka pamilya.
Kun sulod sa taas nga higayon nasuwayan na ang matang sa liderato sa maong pamilya ug walay nakab-ot nga asenso, walay rason alang sa katawhan nga ipabilin ang maong matang sa liderato. Hungog ang tawo nga mopadayon sa naandan luyo sa kasayuran nga wala kini’y padulngan.
Ang pagdumili paghangop sa kausaban sama ra nga imong gitahan ang imong kaugmaon ug ang katungod alang sa maayong panggobyerno. Uban niini ang imo sab nga pagtahan sa imong katungod nga moreklamo sa way klaro’ng serbisyo ug dili makatagbaw nga pag-alagad gikan sa lungsod.
* * *
Samtang mapasalamaton ang mga Sugboanon nga naluwas ang Sugbo gikan sa dakong kadaot nga mugna sa bagyo nga si Pablo, apan nagbangutan ang daghang pamilya sa ubang bahin sa Visayas ug Mindanao tungod sa kamatayon sa daghang mga tawo labi pa didto sa Compostela Valley.
Daghan ang nag-ingon nga angayan nato nga pasalamatan si San Pedro Calungsod tungod sa pagpanalipod sa Sugbo gikan sa kabangis sa bagyo nga si Pablo. Apan angayan tingali nato nga hinumduman ug dili hikalimtan nga labaw kay ni San Pedro Calungsod mas haum sa pagdayeg ug sa atong pagpasalamat ang labaw’ng makagagahom nga mao ang Diyos.
* * *
- Latest
