Nagbunga ang one-strike policy sa kapolisan dinhi sa rehiyon ug duha dayon ka mga hepe sa kapolisan ang gitangtang sa ilang katungdanan human sa malampuson nga ronda sa laing unit diha sa ilang hurisdiksiyon.
Gimando ni Police Regional Office-7 director Chief. Supt. Marcelo Garbo nga relibohan sa katungdanan si Mabolo Police Station chief Enrique Belciña ug Casuntingan Police Station chief Meche Gabod.
Ang kamandoan ni Garbo gipakanaog human malampuson ang pagpangronda nga gihimo sa Regional Special Operations Group (RSOG-7) sa ilang tagsatagsa ka hurisdiksiyon.
Ang mga sakop sa RSOG-7 nga gipangulohan ni Chief Inspector George Ylanan nakadakop og lima ka mga coordinator sa ginadiling sugal sa barangay Lahug sa siyudad sa Sugbo ug barangay Banilad sa siyudad sa Mandaue.
Ang mga nadakpan, sumala sa report sa The Freeman, mao sila si Marivic Estomo Dasculado, Antonio Tingal Cereño, Jose Ranillo Diaz, Romeo dela Peña Cereño ug Elena Maglapa Formentera.
Mga nagkalainlaing kagamitan sa ilegal nga sugal ug kuwarta nga gituohang pusta nasakmit sa kapolisan atol sa ronda.
Mao kini ang atong gisinggit dinhi sa atong Tikdol sa Pordoy niadtong nakalabay nga Oktubre sa dihang atong nadiskubrehan nga kusog kaayo ang ilegal nga sugal didto sa Bohol kay mismo ilang hepe sa kapolisan sa probinsiya gituohan nga nalambigit niini.
Ug hangtod nga nadiskubrehan nga lakip usab diay dinhi sa Sugbo wala mapatuman sa hingpit kining gitawag og one-strike policy.
Sa miaging mga semana, daghan na ang naigo niining one-strike policy. Kini mao sila si Sr. Insp. Ranulfo Espina sa Waterfront Police Station Chief Insp. Pablo Cabildo sa Waterfront Police Station, Insp. Juan Capacio sa Marigondon Police Station, Supt. Henry Biñas sa Toledo Police Station, Insp. Clyde Esguerra sa Mambaling Police Station, Insp. Raymundo Enriquez sa Pinamungajan Police Station ug Insp. Wilfredo Tautoan sa Sibonga Police Station.
Sa lalawigan sa Sugbo mas kusog kining ilegal nga sugal nga masiao. Ug nasayod ko nga ang mga hepe nakaila sa mga pinanser, apan tungod sa giingong “protection money,” wala silay operasyon batok niini.
Sa Minglanilla, ilado kaayo ang pinanser og suertres tungod sa giingong “buhagay” nga nahitabo niadtong Agosto o Sityembre, apan wala pa ko kadungog nga adunay hepe nga naigo sa one-strike policy.
Mga panghinaot usab nga seryoso si Garbo niining iyang one-strike policy batok sa ilegal nga sugal.