Matag Disyembre nagkalainlain ang mga dekorasyon sa balay nga dekuryente nga sayon kaayong mahimong tinubdan sa sunog kun di mabantayan pag-ayo sa tag-bay.
Nahimong tradisyon sa tibuok kalibotan ang pagpanaod og dekorasyon sa kabalayan matag Disyembre tungod kay buwan kini sa pasko.
May mga dekorasyon nga wa magkinahanglan og kuryente, apan may mga dekorasyon usab nga dekuryente sama sa Christmas light.
Ang nakapait lang ning maong matang dekorasyon kay may dekalidad o maayo ug lig-on nga pagkahimo, apan may mga Christmas light usab nga dali ra kaayo molanay kun moinit na ang iyang wiring.
Ang kasagarang unang masunog niining baratohon nga mga dekuryente nga dekorasyon mao ang socket.
Inigtuslok ngadto sa outlet, kumo kay plastic, pipila ka oras samtang mag-ungot sa outlet, aw mura na og sinugbang tawong , moaso, dayon mokatay ang kayo ug mosubay sa kutay sa iyang kuryente, diin kun ang palibot may mga sunogonon nga mga butang sama sa papel o kaha panapton sa kurtina, aw dali kaayong mosilaob ang kayo.
Maayo lang kun mahitabo nga magmata pa ang tagbay, apan kun nahinanok na ang tanan, kasagaran inigmata ugdaw na ang tanan lakip na ang mga kasikbit ug silingan nga mga kabalayan.
Sa pagkakaron naghitak ang mga Christmas décor sa mga tindahan sa mga Chinese products nga barato kaayo. Kasagaran ra ba sa maong mga produkto wa na mag-agi og inspection sa buhatan sa goberno sama sa DTI nga maoy nagbantay sa kalidad sa dekuryente nga mga butang aron di maghatag og kadaot sa mogamit niini.
Maayo unta kun ang tanan nasayud nga ang mga dekuryente nga mga butang sama sa Christmas décor nga na-inspection sa DTI ug namatud-an nga may maayong kalidad, gipapitlan kini og PS Mark o kaha ICC mark. Kay kun wa kining markaha, delikado ug peligro kaayo nga di ka makaabot nga malinawon sa bag-ong tuig, magdaginot ka sa baratohon kaayong Christmas décor apan mougdaw ug moabo sa imong bay puwerting dimalasa.
Unya maayo unta kun ikaw ray dimalason, ang nakapait kay hasta man imong mga silingan mapagan man sa imong pagkadimalas.