Pangandam ni Pablo

Angay’ng kahadlokan si Pablo. Si Direktor Oscar Tabada sa Philippine Atmospheric, Geophysical and Astronomical Services Administration (Pagasa) sa Mactan, nipasidaan nga dako ang kahigayonan nga maigo ang Sugbo. Kun mahitabo, gikahadlokan nga ang bagyong Pablo makahatag og kadaot sama kalapad sa gibilin ni Ruping kapin sa 20 ka tuig ang nilabay.

Kun mosimang si Pablo ug moigo sa Mindanao, mas grabe pa siyang Sendong, segun ni Direktor Benito Ramos sa National Disaster Risk Reduction Management Council (NDRRMC). Gihulagway ni Ramos nga makalilisang ang kalapad sa mga dapit nga maigo ni Pablo uban sa kusog niyang hangin ug daghang uwan.

* * *

May sukaranan ang pasidaan ni Tabada. Naumol si Pablo sa dapit nga labihang ubosa, 6.4 degrees North ug 136.4 degrees East, nga di kasarangan nga sukaranan sa bagyo. Kataposang higayon nga nahitabo ni niadtong Nobiyembre 1990, dihang naumol ang bagyong Ruping. Lokal ug langyaw’ng mga eksperto nidason sa kabalaka ni Tabada nga si Pablo mosubay sa ruta ni Ruping paingon dinhi sa Sugbo.

Mao ni ang ruta ni Pablo nga naghagiyos na karon sa kapin sa 200-300 ka kilometro matag takna sa mosunod nga tulo ka adlaw: Motabok sa Palau Islands Lunes sa buntag, motugpa sa Surigao City o Siargao Islands  karong Martes sa hapon, motabas sa Central Visayas karong Martes sa gabii, moagi sa tungatunga sa Bohol ug Southern Leyte ug motabok sa tungatungang Sugbo human sa tungang gabii sa Miyerkules ug mosaka sa Negros Oriental inig banagbanag sa Miyerkules.

* * *

Gipaabot nga mas mokusog pa gyud si Pablo ug mahimo nang Super Typhoon sa mosunod nga mga takna. Gitakda hinuong mohinay dayong tugpa sa Surigao tungod sa katugnaw sa kadagatan sa Pilipinas. Mas mohinay pa gyud inig abot sa Sugbo human masagang sa kasilinganang kabukiran sa Kabisay-an.

Sa akong pagsuwat ini, si Pablo nahimutang sa: 155 ka kilometro sa silangan gikan sa teritoryo sa Pilipinas; 2: 228 ka kilometro silangan-habagatan-silangan sa Koror, Palau; 1,127 ka kilometro silangan-habagatan-silangan sa Mati City; 1,132 ka kilometro silangan-habagatan-silangan sa Bislig City; 1,223 ka kilometro silangan-habagatan-silangan sa Siargao Island; 1,258 ka kilometro silangan-habagatan-silangan sa Surigao City; 1,365 ka kilometro habagatan-silangan sa Tacloban City;  1,339 ka kilometro habagatan-silangan sa Borongan City; ug 1,440 ka kilometro silangan-habagatan-silangan sa Metro Cebu.

* * *

Angay tang mangaliya nga mahilis ang bagyo sa di pa makamugna og bisan unsang kadaot sa yuta. Di tawhanon ang pagpangandoy nga mosimang si Pablo sa laing dapit.

Kun moabot sa Sugbo, duna tay tulo ka adlaw’ng lugway pagpalig-on sa atong pinuy-anan, o pagbakwet sa mas luwas nga mga dapit, ug pagpangandam sa posibleng pagkaputol sa suplay sa tubig ug kuryente.

* * *

Email: [email protected]