TUMONG: Imantala ang mga mahinungdanong kamatuoran sa kinabuhing Pastoral ni Obispo Teofilo Bastida Camomot
Ang Tan-aw, Lantaw, Lakaw nga kahimanan sa Pangalagad
a. Tan-aw — Tungod kay nagsugod man kita sa kasinatian, ang desisyon ug hukom sa lihok nga Kristohanon ang magsugod gyud sa pagsusi sa iyang sitwasyon ug sa ilang kahimtang katilingbanon. Atong pangutan-on kun unsa ang atong kahimtang karon (positibo man o negatibo) aron atong makit-an ang mga hinungdan niini. Ang atong kanunay nga mga pangutana: Unsa? Ngano man? Nganong naingon ini man ang atong kahimtang?
b. Lantaw— Lahi ang lantaw kay sa tan-aw. Sa tan-aw duol kini samtang sa lantaw halayo. Nga sa ato pa, imong gilantaw ang usa ka reyalidad ginamit ang lahi nga perspektibo. Ning paagiha pagalantawon ang usa ka panghitabo ginamit ang pagtulon-an sa simbahan ug sa perspektibong Kristohanon, diin mohimo ka og usa ka mapalandungong pagkaplag sa kabubut-on sa Dios pinaagi sa personal ug katilingbanong pagpamalandong.
c. Lakaw — Usa kini ka lihok agi’g sanong sa gihimong pagpamalandong sa mga panghitabo sa atong palibot. Usa kini ka katilingbanon ug personal nga paagi sa pagbansay sa atong tubag sa mga suliran sa atong palibot ginamit ang pagtulon-ang Kristohanon. Ang paghukom sa angayan natong himuon. Usa kini ka panaw sa pagtuo nga molambigit og buhat. Kay ang pagtuo nga wala’y buhat patay.
Si Obispo Teofilo Camomot nakighugoy-hugoy ug naniid sa mga panghitabo (Tan-aw) iyang gidala ang matag kasinatian sa pag-ampo ug pamalandong (Lantaw) ug sa kinasingkasing nga paagi duna siya’y gihimo agig sanong sa matag panginahanglan (Lakaw). Mahimo nato siyang pagahukman nga nitugot nga magpailad sa mga mapahimuslanon apan dunay sukaranan ang maong Obispo sa pagbuhat sa ingon. Ug ang maong sukaranan mao ra gyud ang iyang dakong tinguha nga higugmaon ug alagaran niya ang Dios pinaagi sa paghimo og maayo ngadto sa iyang mga kaigsuonan. Mahisama unta niya ang atong mga kaparian ug mga lumilihok sa Simbahan.