Lab-as pa sa atong panumduman ang minilyon ka mga sakong bugas nga gipamalit sa National Food Authority gikan sa gawas sa nasud panahon sa administrasyong Gloria Macapagal Arroyo nga gipalata ug gipabaho lang sa mga bodega bisan sa kadaghan sa atong mga kaigsoonan nga walay mga kaon.
Wala pa gani mahuman sa pagtaral ug wala pa gani masiloti ang mga opisyal sa National Food Authority nga nagpasiugda sa pag usik-usik sa bugas ug salapi sa katawhang Pilipinhon nagpabadlong na usab pagbalik ang nahisgotantg ahensiya sa gobiyerno.
Didto sa kaulohan, sa special report sa GMA 7 News and Public Affairs nasayran nga adunay hapit moabot sa 50 mil ka sakong I-Rice nga bugas (humay nga adunay iron) ang nangadaot ug dili na mapahimuslan tungod kay nag-expire na. Ang maong gidaghanon mobalor sa sobra sa 200 milyones ka pesos. Ang kayabag sa National Food Authority misuol na usab dihang mihukom kini nga ila gihapong ipakaon sa mga tawong makaabot sa pagpalit ang mga I-Rice.
Dinhi sa Sugbo 17 milyones ka sakong bugas usab ang nawagtang sa bodega sa National Food Authority nga nahimotang sa lungsod sa Badian. Apil usab sa nawagtang nga bugas mao ang opisyal sa nahisgotang ahensiya nga gitahasan sa pagbantay ug pagbaligya niini. Ang 17 milyones ka sakong bugas nagsugod pagkawagtang niadto pang tuig 2007 hangtod karon.
Naunsa ba ang National Food Authority nga nagpabadlong man? Wala na ba gyod ni silay laing ikatampo sa gobyerno? Ang pagpabadlong ra gyod? Ug dili man gani pabahoon, palataon ug pa expiron ang mga bugas, pangwagtangon. Usahay makigkumboya pa sa mga smuggler og bugas. Ingon ani na gyod ni sila? Ay ambot lang.
* * *
Kaniadtong Domingo hapit moabot 200 ka mga bag-ong sakop sa TAMA - Tabang Alang sa Maayong Alagad ang nakadawat og mga pinutos gikan sa mga tawong matinabangon. Tungod sa ilang pagkamatinabangon ako silang pasalamatan ug ipasigarbo diha kaninyo.
Ang akong pasalamatan ug ipasigarbo tungod sa ilang pagkamangihatagon mao sila si Nyor Richard Rodriguez, tag-iya ug tagdumala sa First Child Royal Academy sa Dumlog, Talisay ug sir Jimmy Tee sa Longwin ug Jumy Marketing sa Talisay City, Atty. Tomas Riveral, Presidente sa OPASCOR ug Jonathan Fernandez, Operation Manager sa OPASCOR, Sir Noel sa KOI HERBAL FOOD SUPPLEMENT ug P/Sr.Supt. Erson Digal sa PRO 7.
Kaninyong tanan salamat, salamat, salamat ug walay hunong namong pasalamat kaninyo nga mitabang namong mga kabus.