Dako og bintaha kining balaod nga gitawag nga Kasambahay law o balaod alang sa mga katabang sa balay tungod kay may giya na ang mga amo bahin sa hustong paghatag og suhol uban ang mga angay nga benepisyo sa ilang mga katabang.
Sumala sa gihan-ay na, ang mga katabang sa balay sa Metro Manila may standard nga dawatunong suhol nga tag P2,500 matag buwan, sa mga siyudad gawas sa Metro Manila, P2,000; samtang sa mga lungsod P1,500.
Sa bahin sa oras, kinahanglang motrabaho ang katabang sulod sa 8 oras matag adlaw, may katungod sila nga mopahimus og usa ka adlaw nga day off matag semana.
Ipa-miyembro sila sa SSS, Pag-Ibig, ug PhilHealth, ug may 13th month pay na, ug sa laktod makita nato nga sa kadugay na nga panahon sa panarbaho sa mga katabang sa balay karon pa mahunahunai sa mga magbabalaod ang pag-umol og balaod nga pabor kanila.
Kay ang tinuod, daghan kaayong mga amo nga ang pagtan-aw sa katabang nila murag labing ubos nga miyembro sa katilingban nga angay lang sugo-sugoon bisan unsang klasehang trabahuon sa balay.
May mga amo nga kun mahimo pa lang nga di kapuyon ang iyang katabang gusto niyang patrabahuon kini sulod sa 24 oras matag adlaw.
May mga amo nga kusog modaug-daog sa ilang mga katabang sa balay pinaagi sa di paghatag og hustong pagkaon, di mohatag og hustong suweldo ug way pagpakabana bahin sa SSS, Pag-Ibig ug PhilHealth, ingon man ang 13th month pay niini.
Pinaagi niining Kasambahay law, ang mga amo nga abusador magkingking na tungod kay kun mosumbong sa mga otoridad ang ilang mga trabahante, segurado gyung mapahamtangan sila og silot subay sa gitakda sa Kasambahay law.
Hinuon sa laing bahin, ang pamilyang ang-ang ang kahimtang di na makahunahuna pagkuha og katabang, nga sa laktud daghan nang mawad-an og gana sa pagkuha og katabang sa balay gumikan niining maong balaod.