Uso kaayo ning atong henerasyon ang patik o tattoo sa dakong bahin sa lawas sa tawo. Kaniadto ang usa ka tawo nga dunay mga tattoo sa lawas dudahan nga gikan sa bilibid.
* * *
Karon ang tattoo o pagpa-tattoo nahimo nang status symbol. Sikat, matud pa sa uban, ang usa ka lalaki nga dunay tattoo o patik labi na kun hapit na napuno ang lawas sa maong patik.
* * *
Kadaghanan sa atong mga basketball player sa PBA “patikado” ang lawas. Bisan ang pipila sa mga collegiate players duna say tattoo.
* * *
Naay mga nagduda nga kini tungod kay patikado man ang mga player sa NBA, gisunod sab sa atong mga PBA stars. Naa gani PBA players nga mas sobra pa kadaghan ang tattooo kay sa NBA superstars.
* * *
Dili pa lang dugay dihay nigawas sa The Freeman Ear column diin giingon nga usa ka estriktong amahan mipasidaan sa iyang mga babayeng anak sa dili pagtangdo sa mga suitor nga dunay tattoo kon patik.
* * *
Ug suma pa sa maong Ear column, ang maong pasidaan sa amahan hugtanong gisunod sa mga anak. Diha kunoy usa ka suitor kon maghahalad kinsa nag-uros-uros ang gugma sa usa ka anak ning estriktong amahan, gigastuan gayud ang pagpapapas sa iyang tattoo sa buko-buko.
* * *
TRIVIA. Daghang salamat ngadto ni Ma’am Patring las Marias, Ph. D., sa “inspiring comments” bahin sa Banat News. Hinaut unta nga magpadayon ang imong pagsuporta sa Banat News, Ma’am Patring.