Ang kadalanan sa Pilipinas gikonsiderar nga labing risgo tungod sa kadaghang aksidente nga mahitabo. Usa sa mga gitumbok nga hinungdan niini mao ang kadanghag sa ubang mga driver nga dili motuman og mga lagda sa trapiko unya kusog pa gyud nga mopadagan sa ilang mga sakyanan samtang laing hinungdan mao sab ang mga pedestrians o mga tawo nga magpataka lang og labang sa kadalanan. Apan kun ikaw mabanggaan og sakyanan, unsay maayo nimong buhaton? Kana nga pangutana ang atong tubagon karon.
* * *
Dear Atty. Divine,
Mikonsulta ko nimo tungod sa problema sa akong anak nga nabanggaan og sakyanan niadtong miaging semana. Ang driver ug tag-iya sa sakyanan mipasalig sa pag-abaga sa gastuhan sa bata, nagbilin siya og number sa telepono nga pwede siyang matawgan apan karon nga among gikontak wa may motubag. Dako-dako na mi og nagasto sa hospital kay duna may bali ang tiil sa bata ug medyo mahal ang mga tambal. Amo na hinuon ning na pa-blotter apan kun di siya mobayad sa hospital unsa may maayo namong buhaton? Hinaut nga imo ming matambagan sa among problema. — Isko
* * *
Dear Isko,
Kun ugaling dili gyud motunga sa hospital ug dili mo-abaga sa gastuhan ang driver o tag-iya sa sakyanan nga nakabangga sa imong anak, kinahanglan gyud mo nga mokiha kaniya. Ubos sa atong balaod, ang driver nga makabangga og tawo o pedestrian mamahimomg mapasakaan og kasong criminal ug civil case. Basi sa Revised Penal Code sa Article 365 ang driver nga makabangga mamahimong ikiha og reckless imprudence resulting in physical injuries. Samtang ang iyang Civil liability anaa sab nalatid sa Article 2176 sa atong Civil Code nga nagkanayon “whoever by act or omission causes damage to another, there being fault or negligence, is obliged to pay for the damage done. Such fault or negligence, if there is no pre-existing contractual relation between the parties, is called a quasi-delict.” Sa ato pa, kinahanglan gyud siyang mobayad sa tanang nagasto ninyo sa bata sa pagpahospital lakip na sa iyang mga tambal tungod sa iyang kadaut nga nahimo sa bata human kini niya nabanggaan. Ang maayo ninyong buhaton karon mao ang pagsusi sa pinuy-anan sa maong driver aron inyong pakigsultian ug kun di gyud ninyo madala og areglo mas maayo nga adto na lang kamo mag-atubang sa Korte. Tungod kay kamo man ang biktima, mamahimo ra nga dili na mo mokuha og inyong abogado, ang Police maoy motabang kaninyo sa pagpasaka sa kaso ngadto sa Prosecutor’s Office ug human sa imbistigasyon kun masuta nga adunay basihan ang inyong kaso, ang Prosecutor’s Office na unya ang mopasaka sa inyong kaso ngadto sa Korte. Hinaut nga akong natubag ang imong pangutana. — Atty. Divine
Alang sa inyong pangutana, ipadala lang sa Legal Corner sa Banat News or email sa flores_divina@yahoo.com.