Kining kinabuhi sa tawo dili lang nato mahibaw-an nga moabut kanato. Kinsa man go’y magdahum nga si Marlon Bellita mamatay na diay.
Pareho man gud mi si Marlon nga dunay nakasinati og dili maayo sa among panglawas. Nakahinumdom pa ko kaniadto nga ako siya nga gipangutana nganong miniwang siya.
Gitug-anan ko ni Marlon sa rason apan dili na lang nako idetalyi pa. Dihang giatake siya, gikuyawan ko kay wala ra ba sa’b diay ko makainom sa akong tambal kay bisi kaayo sa last day sa pagpangrehestro sa mga botante adtong Oktobre 31.
On-Leave ko sa akong trabaho sa The Freeman ug DYLA sulod sa walo ka adlaw gikan adtong Lunes kay nagpa-check-up ko sa akong panglawas. Ang usa sa mga doktor ni Marlon, maoy akong doktor.
Kini maoy nakatug-an nako nga si Marlon mamatay na. Giingnan ko sa doktor nga akong higala nga dili na gayud magdugay pa si Marlon kay mius-os na pag-ayo ang iyang blood pressure.
Kay Chong Hua Hospital man ‘sab ko magpa-examine, dali ra ko nga miabot sa Intensive Care Unit (ICU). Tuod, nakaabut ko didto alas 6:05 sa hapon ug patay na si Marlon.
Upat ra mi didto sulod sa ICU, ang igsoon, asawa ug inahan ni Marlon. Wala ko kapugong sa pagtulo sa akong luha kay amigo man gud mi kaayo si Marlon.
Kanunay kami nga mag-uban si Marlon nga motambong kun adunay “party” si City Administrator Jomar Poblete. Sa usa ka birthday party ni Atty. Poblete, giawhag nako si Marlon nga mohimo’g joke.
Mao kadto nga mihimo dayon siya og “joke” kun unsaon pagkanta sa usa ka amang. Kun magtan-aw ka sa sinyas, hilas tan-awon apan dihang iya na nga hubaron pinaagi sa pagkanta, mahakatawa ka g’yud.
Ingon niana si Marlon nga makalingaw sa mga tawo mao nga sikat siya kay kanako bisan og una ko sa pagpanibya kay kaniya. Karong hapon, ilubong na si Marlon. Babay na lang Marlon!
* * *
Belated birthday greetings diay sa pinangga nako nga “sangay,” -- si Rene Mercado – ang pangulo sa Cebu City Mining Regulatory Board. Nobiyembre 17 g’yud ang iyang birthday, apan ang selebrasyon gihimo niya didto sa Casino Espanol kaniadtong miaging gabii.
Pwerteng lingawa namo kay duha g’yud ka banda ang gidapit nga motukar sa mga standard songs. Unya, kay apil man sa mitambong si Max Surban sa maong party, gipakanta namo nga maoy nakapadugang sa kalingawan.
Happy Birthday Sangay!!!!