Ang America maoy usa sa mga nasud sa kalibotan nga kanunay nga gidamgo ug gipangandoy sa tawo nga ilang masuroyan ug kapangitaan og trabaho tungod kay tua didto ang gitawag nila nga greener pasture.
Kini tungod sa pagkabaniog sa maong nasud sa kaabunda sa ekonomiya nga lahi kaayo kun itandi sa mga nasud nga nag-ilaid sa kakabus sama sa Pilipinas.
`Sa kaabunda sa mga molupyo sa Amerika, ang ilang mga appliances nga mo-edad na og duha ka tuig, sayon kaayo nilang ilabay sa basurahan.
Busa ang mga Filipino usab nga tua didto nga naanad sa kakabus, malipay kaayo nga mamasura didto aron hakuton nganhi sa nasud ang mga linabay na nga butang sa mga Amerikano.
Busa tungod kay naanad ang mga molupyo didto sa kaabunda sa ilang ekonomiya, nakalitan sila dihang nasugamak ang nasud sa gitawag nga economic recession. Diin gumikan sa pagdahili sa ilang ekonomiya daghang mga kompaniya ug nagkalainlaing trabahoan nga nanira kay nabangkarota nga misangpot usab sa pagkadaghan nga nawad-an og trabaho
Dinhi sa Pilipinas, naanad na kaayo ang kadaghanan sa mga Filipino sa kakabus.
May mga pamilya nga one day one eat, kun may kan-on man, ug way ikapalit og sud-an modangop dayon sa “target” (asin nga targeton sa tudlo) aron lang molahutay ang kinabuhi.
Apan bisan ingon niini, kontento kaayo ang daghang kabus nga mga Filipino, nga bisan gutom kaayo, inigdug na sa magtiayon sa kagabhion sulbad ang tanan labi na kun magpinandayay na og bata.
Busa mas bubintaha ang mga Filipino nga naanad sa kakabus, kay bisan og magbubalintong pa sa ka-pobre, dali ra kaayong lipaton ang kaugalingon aron malipay ug kalimtan ang kakabus.
Lahi sa mga Amerikano nga gumikan kay naanad sa kaabunda, daghan kaayong nawad-an sa paglaum dihang nawad-an og trabaho kay mauwaw nga tawgon silang kabus kay nagpuyo man sa nasud nga adunahan.