CTU Main Campus, Cebu City—Dul-an sa 20,000 ang nakapahimus sa dakong piyesta sa libreng mga pangalagad dinhi. Bisan sa naglingiting nga kainit tibuok adlaw, nga gipasiunhan og kusog nga bunok sa uwan sa pipila ka bahin sa Sugbo sa kadlawon, dakong bawod sa katawhan ang nipuno ning kapin sa duha ka ektarya nga hawan. Ang kadaghan sa mga gustong mopahimus sa Grand Halad sa Kapamilya nakapugos sa mga guwardiya pagtak-op sa gate buyon sa M. J. Cuenco Avenue. Nahadlok silang madat-ogan ang senior citizens nga nag-una sa linya kay nagtudlanay na ang mga nagsunod nila.
***
Aron maibanan ang grabeng kahuot sa main gate, napugos mi pagpabalhin sa senior citizens, mga babayeng nagsabak ug may gagmay’ng mga bata ug mga may kakulian sa panglawas ngadto sa gate sa bahin sa dan sa R. Palma. Nga dihang nabantayan sa pipila nagsugod dayon og kapuno ug sa wa magdugay naghuot na sab. Maong nahukman namo nga ablihan ang main gate sa M. J. Cuenco. Giawhag namo ang mga nagpunsisok nga katawhan sa pagsibog og diyutay ngadto sa dan ug gihangyo nga maghinayhinay pagsud ug di magtudlanay. Tibuok gate ang among giablihan ug human sa napu ka gutlo nakasud ang kaliboan ka mga tawo, nga way bisan usa nga naangol.
***
Mangayo mi og pasaylo sa tanang nalangan pagsud dinhi. Ang among paningkamot paghapsay sa mga linya sa nagkalainlaing mga pangalagad maoy nakaaghat namo sa pag-anam-anam sa ilang pagsud. Apan naapsan mi sa dungan nga pag-abot sa bagang duot sa katawhan ug wa dayon makausab sa among mga lagda sa seguridad. Natinuod hinuon ang lain namong gikabalak-an. May nakasud gyod nga pipila ka mangunguot. Apan ang presensiya sa daghang kapolisan ug kasundalohan, ingon sa abtik nga mga kadete sa NSTP ug ubang mga boluntaryo, nakabaraw sa pagbuylo sa daotan nilang mga tinguha.
***
Ang pagpahigayon sa Grand Halad sa Kapamilya dinhi naatol sa pagsaulog sa ikatulong anibersaryo sa pagka unibersidad sa CTU. Si CTU President, Dr. Bonifacio Villanueva, nitataw nga ang kabukas sa pagtinabangay sa CTU ug sa ABS-CBN maoy nakapalambo sa kalamposan sa daghan na uyamot nga hinugpong nga mga proyekto. Haom sab kaayo ang mga bahin sa Balaang Kasulatan nga gibasa atol sa misa, nga maoy nibukas sa Grand Halad sa Kapamilya, ug ang wali ni Padre Jesus Macatisbis, OAD: Ang bug-os nga pagtuo maoy labing dakong katigayonan nga ikahalad ngadto sa Labaw’ng Makagagahom; ang pagpalambo sa edukasyon sa kinabag-an sa katawhan maoy usa sa labing lunsay nga pangalagad; ug ang labing gagmay nga pangalagad maoy labing batakan nga panginahanglan sa pagtanyag sa labing dagko nga mga pangalagad.
***
Email: leo_lastimosa@abs-cbn.com