EDITORYAL - Indian di paihion sa publikong lugar

Nadesisyonan  sa kagamhanan  sa India  ang paggamit  og  bombo ug serbato  nga maoy  ipalanog  ngadto  sa  lalaki  ug babaye  nga  masakpan  nilang  anha  lang  mopatil-is  sa  ihi  sa pampublikong  lugar.

Hinuon  una  nila  kini ipatuman,  matag  lugar   nga  pundokanan  sa  tawo  sa India gipatukoran  gyud  sa goberno  og  mga  pampubliko nga  pansayan  ug  gidasig  ang tanang  lalaki  ug babaye  nga adto  didto  mosalibay  sa ilang  hugaw  sa lawas.

Gihimo  kini  sa kagamhanan  sa  India  tungod  kay  namatikdan  nila  nga  kasagaran  sa  mga  lalaki, inigkakita  og  eskina o kaha  poste, pader ug  bisan  asang suoka,  dali kaayong  makalanit  sa ilang  kinatawo  dayon  mopatil-is.

Usahay   bisan  daghan  pang  tawo  nga anaa  sa ilang  palibot,  di mauwaw  ug  di gyud maikog, mopatil-is  gyud  nga nakapalagot  sa  mga opisyal  sa lokal  nga   kagamhanan.

Gumikan  niini  gipatuman  sa kagamhanan  ang balaod  nga  matag  lokal  nga  unit  sa kagamhanan  kinahanglang  magpatukod  gyud  og  public toilet  ilabi  na  sa  mga  lugar  nga  pundokanan  sa  daghang  tawo sama  sa merkado,  plaza  ug  uban  pa.

Gibalaod  sa kagamhanan  sa nasud  nga  kutob  sa lalaki  ug babaye  nga  masakpang  mopatil-is  sa  pampublikong  lugar, duolon  dayon  sa usa ka team  kansang  mga  hiramenta  mao  ang  bombo  ug  serbato.

Dayon  samtang  nangihi,  pabunalan  dayon  og  todo  ang   bombo  dayon  tayhupon  way tihiktihik  ang  mga serbato  aron  masayran  sa katawhan  nga  may  nangihi  sa maong  lugar.

Gawas  sa maong  sistema,  mogamit  usab  ang  kagamhanan  og  sakyanan  aron  ibandilyo  ngadto sa publiko  ang  ngalan sa  nadakpan  sa tuyo  nga  di  na kini  mousab  sa iyang  nabuhat.

Dinhi  sa Pilipinas  ingon  ra ba  usab  niini  ang  kinaiya  sa  mga Filipino  nga  basta  kaihion  mangita  dayon og hilit   nga  lugar, ang  mga  lalaki  dali kaayong  makalanit  sa kinatawo  dayong  patil-is.

Mas  arang-arang   ang  mga  babaye   dinhi  kay mangita  gyud  og  CR, apan  usahay  aduna  say  moiwang  lang  oi  basta  aduna  kapahipian  og  dyutay. Apan  tungod  sa kaaktibo  dinhi  sa balaod  bahin  sa human  rights, mura’g di mosaler  ang  bombo ug serbato dinhi.