Libkason ni Gobernador Gwen Garcia ang P5 nga bayranan sa matag pasahero nga mosud sa Cebu South Bus Terminal sugod karong Nobiyembre 1 tungod sa awhag sa katawhan ug sa iyang mga alyado sa politika. Mao nay sulti sa ilang press release.
Lahi ang akong nahibaw-an. Way kapilian si Garcia. Kun ipadayon ang paugat sa pagkolekta sa P5 nga terminal fee, uban ang naandang katin-awan nga gamiton ang minilyon ka pesos nga koleksiyon pagpalambo sa terminal, ilang kaugalingong surveys nagpakita nga ang mga Garcia nga nanagan sa piniliay sa Mayo 13 sunod tuig ma-PJ. Pilde Jud.
* * *
Kasaligang tinubdan sa One Cebu nipahibawo nako nga ang ilang surveys nagpakita nga negatibo ang pagtan-aw sa mga Sugbuanon sa mga Garcia tungod sa mosunod: Mga pasangil sa pagpangawkaw; P5 nga terminal fee; ug kamaldita sa gobernadora. Wa na man silay mahimo sa una ug ikatulo, ang ikaduha na lay giatiman.
Ang terminal fee nahimo nang isyu sa piniliay sa 2010. Nisaad si gubernatorial candidate Junjun Davide pagpapas sa bayranan kun siya nay gobernador. Nakugang ang mga Garcia sa kadaghan sa boto nga nakuha sa uwahi na kaayong kampanya ni Davide. Namasin silang makatabang ang pagpapas sa terminal fee paglugway sa ilang dinastiya.
* * *
Ang paglugak sa mga Garcia dakong kadaogan sa mga Sugbuanon. Bisan pagarpar ray ilang nadawat nga suporta gikan sa mga politiko nga nanaway sa terminal fee. Determinadong gipadayag ang ilang pagsupak sa pagpanguwarta sa batakang serbisyo alang sa katawhan.
Si anhing Bise Gobernador Greg Sanchez nipahibawo nga nag-andam si Davide og kaso batok ni Gobernador Garcia pagkuwestiyon sa legalidad sa pagpahamtang sa terminal fee nga way ordinansa gikan sa Provincial Board (PB). Way bisan unsang kaso nga napasaka hangtod karon. Utrong inutil ang PB. Bisan nakuha nang Bise Gobernador Agnes Magpale ang mayoriya sa board members, way bisan usa nila nga nangahas pagsubli sa kamakiangayon sa terminal fee.
* * *
Kaligdong maoy nakapugong ni Davide sa pakig-indig sa pamintaha nga pangampanya sa iyang mga kaatbang. Panagana nga mapasanginlang sayo nga namolitika mahimong mao say nakapugong ni Magpale sa hingpit nang pagdeklarar og gubat batok ni Gobernador Garcia.
Apan ang ilang kamapanagan-on gipahimuslan sa mga Garcia. Nga mohimo sa tanang desperadong mga lakang aron magpabilin sa gahom. Kay kumbinsido ang mga Garcia nga ang piniliay sunod tuig maoy ilang kataposang hunat. Nga goodbye bunot na kun mapalagpot sila sa Kapitolyo. Nga ang pagdaog sa mas gagmay nga mga puwesto di makapugong sa hingpit nga paghagsa sa ilang kahawod. Nabatyagan na sa mga Garcia, mao nga determinado nilang pugngan kutob sa mahimo, ang nagkaduol na nga adlaw sa panudya.
* * *
Email: leo_lastimosa@abs-cbn.com